França a lançat un plan per consolidar e far créisser l’imposicion del francés en Africa

Dijòus passat, 20 de març, Jorn Internacional de la Francofonia, l’estat francés lancèt un projècte nomenat 100 000 Professors per Africa, qu’a un budget de 4 milions d’èuros per tres ans e qu’a per tòca de contunhar e consolidar l’imposicion de la lenga francesa en Africa.

 

“En Africa una corsa de velocitat es engatjada entre creissença demografica e creissença educativa e cal qu’aquesta darrièra ganhe”, çò diguèt lo ministre francés dels afars estrangièrs Laurent Fabius, que calcula qu’en 2050, aperaquí 500 milions de personas poirián èsser de locutors del francés.

 

Lo ministre planh que lo mestritge del francés es a se degradar, e qu’en reaccion cal sustot “accionar una dinamica” e “emplegar totas las possibilitats del numeric per ensenhar lo francés”. De fach, amb aquel projècte, se formarà dins l’estat francés de tutors qu’enquadraràn en seguida e a lor torn de professors d’universitat e que desvoloparàn d’espleches de formacion a distància.

 

Los primièrs païses tocats seràn la Republica de Còngo, Nigèr, Tògo, Mali, Madagascar, Marròc, Zimbabwe e Ghana, ont l’Institut Francés, qu’es l’operator de l’accion culturala de França a l’estrange, coordenarà dètz missions dins los departaments universitaris d’ensenhament del francés. Dins aquel sens se son dessenhats qualques espleches cibernetics de ressorsas pels ensenhaires de la lenga d’oïl.

 

Africa es “lo continent on se jogarà l’avenir de la nòstra lenga”, çò declarèt la ministra francesa delegada a la francofonia, Yamina Benguigui.

 

A l’ora d’ara, en Africa se parla aperaquí 1500 lengas de quatre grandas familhas lingüisticas: l’afroasiatica, la nigèrocongolesa, la nilosahariana e la khoisan. Mas al delà de las lengas autoctònas, en Africa se parla anglés, francés, portugués e espanhòl coma consequéncia de la colonizacion. Amb l’independéncia de las colònias, mantes estats africans contunhèron d’aver la lenga europèa coma lenga oficiala. Dins aquel sens, França es una de las poténcias colonialas que mai s’afana per i manténer l’emprenta de sa colonizacion. 

[Image: Abdallah - poblejat dins www.jornalet.com]