Campanha per l’occitan dins lo tramvai e lo bus a Tolosa

Lo collectiu Endavant ven de lançar una campanha per demandar la preséncia de l’occitan dins lo tramvai e lo bus de Tolosa, de la meteissa faiçon qu’es present dins lo mètro de la Ciutat Mondina.

 

Es una peticion que, se capitava, donariá “fisança als tolosans dins lor cultura” e permetriá “d’integrar melhor los immigrants del nòrd coma del sud”, çò argumenta la còla d’Endavant.

 

De fach, en mai de respectar los dreches de la lenga autoctòna, Endavant a lançat aquela campanha “perque l’occitan es lo nòstre patrimòni, perque los tolosans i son mai que favorables, perque s’agís de rendre una coeréncia e un començament de politica lingüistica a Tolosa” ont l’occitan es ja dins lo mètro, e “per socializar l’occitan e donar de sens a son ensenhament”.

 

Endavant es un collectiu de personas, independent, que vòl desvolopar e socializar la lenga occitana dins la vida vidanta, per que demòre una lenga sociala e populara dins lo país. An tanben per tòca de far conéisser la lenga e la cultura al pòble e a l’encòp son per una Occitània dobèrta a tota persona, lenga e cultura en refusar lo comunautarisme e lo faissisme. Lo mond d’Endavant participan al movement local de lucha per l’occitan a travèrs d’accions popularas e visiblas.

 

Podètz signar la peticion en clicant sus aqueste ligam.

[Poblejat dins www.jornalet.com]