De joves tzotzils fan de cinèma per se far conéisser al Mond e preservar lor cultura

Qualques joves tzotzils, indignats per l’imatge maquilhat que lo Mond a de Chiapas, an decidit de far conéisser lor pòble, lor cultura e lor istòria. Per aquò far trabalhan lo filme documentari. “Nosautres nos devèm defendre dels retraches de l’exterior, que solament mòstran los afars folclorics e representan pas la vida vidanta del nòstre pòble”, çò disiá lo jove cineasta tzotzil, Manuel López Pérez, al jornal mexican El Universal. “Çò que cercam es de far difusion de la nòstra cultura e mostrar la vertadièra riquesa qu’avèm”, çò apondèt Abraham Gómez.

 

S’agís d’un grop de gojats de qualques 20 ans amb l’enveja e lo vam per que lors tradicions, las colors de lors vilas, lor musica e lors costums se pèrdan pas. “Nos confessam pas vencuts, se nos cal enregistrar amb los telefòns mobils o fasèm, mas es plan complicat perque a la fin de la jornada nos cal manjar, e viure, e es complicat de se dedicar 100% al cinèma”, çò disiá David López.

 

Es gràcias a un projècte institucional que los joves tzotzils se son sarrats del mond del cinèma. Aquela institucion del Centre de Capacitacion Cinematografica (CCC) de Mexic fa de corses de documentaris dempuèi tres ans a San Cristóbal de las Casas. An tanben una sedença a Oaxaca e lèu n’auràn una autra a Michoacán, en visant de conscienciar lo sector indigèna de la populacion.

 

“Vòli pensar que tot aquò es un investiment de 10 ans, ont eles auràn l’oportunitat d’èsser competents e afrontar qué que siá”, çò expliquèt lo director del CCC, Henner Hofmann. Lo director apondiá que lo CCC tanben provesís de material cinematografic e l’escòla encoratja totes a participar. Dins aquel sens, cal dire que 70 personas sollicitèron de far la tresena edicion del cors, mas i aviá solament de disponibilitat per un vintenat.

 

Los darrièrs escolans, los fraires Pérez, declarèron: “volèm far partida d’aquesta generacion que vòl recuperar las tradicions que las nòstras gents daissan morir, e ne daissar un testimoniatge abans que tot aquò desaparega”. Eles son a far un reportatge sus la musica tradicionala.

 

Los tzotzils son un pòble de lenga maia de l’America Centrala. 

[Image: CLACPI - poblejat dins www.jornalet.com]