Cinc mila personas en camiseta verda manifestèron per defendre lo catalan dins las escòlas balearas

Las protèstas se concentrèron davant la Conselhariá de l’Educacion a Palma

Près de cinc mila manifestants se concentrèron, divendres 20 de setembre, davant la Conselhariá de l’Educacion, a Palma —la capitala de las Illas Balearas—, dins una novèla protèsta contra lo decret polemic del Tractament Integrat de las Lengas (TIL). Amb aquel decret, lo govèrn autonòm balear, dirigit per lo Partit Popular (PP), vòl demenir e desvalorizar lo catalan dins las escòlas.

La manifestacion a la
Conselhariá de l’Educacion

Las consignas de la manifestacion, en forma de crits e pancartas, èran basicament contra lo TIL e demandavan la demission del president balear, José Ramón Bauzá, e de sa conselhièra de l’educacion, Joana Maria Camps.

Los manifestants, la majoritat amb de camisetas verdas, tornèron cantar lo cant de resisténcia L’Estaca, de Lluís Llach, coma ja o avián fach dijòus a l’Universitat de las Illas Balearas (UIB).

Lo govèrn refusa que lo rector de l’universitat siá mejancièr dins la cauma dels ensenhaires

De manifestants a la Nuèch de
l’Art de Palma

Lo govèrn refusèt divendres l’ofèrta del rector de l’Universitat de las Illas Balearas, Llorenç Huguet, per èsser mejancièr entre l’executiu balear e los ensenhaires dins lo conflicte educatiu. “Avèm pas de besonh de mejancièrs per negociar”, çò declarèt la pòrtavotz del govèrn balear, Núria Riera, que diguèt que lo problèma —segon ela— èra que los ensenhaires volián pas negociar mas impausar. 

Bauzá e Camps assistiguèron pas a la Nuèch de l’Art de Palma per evitar d’èsser escridassats 

De manifestants a l’inauguracion
de l’annada universitària

La tradicionala Nuèch de l’Art de Palma, qu’artistas e expausants l’aprofièchan per i mostrar lors òbras dins una granda exposicion nocturna e festiva amb las pòrtas dobèrtas, foguèt pas ongan una nuèch normala. Tradicionalament, los representants politics maxims de las Balearas i assistisson e se barrejan amb los ciutadans. Mas dijòus, ni lo president José Ramon Bauzá ni la conselhièra de l’educacion, Joana Maria Camps, anèron pas al centre cultural del Casal Solleric (a Palma), per fin d’evitar d’èsser escridassats pels centenats de ciutadans que los esperaven amb de camisetas verdas de protèsta, en plena cauma indefinida de l’ensenhament e amb la tension que pojava de mai en mai. 

De matin Bauzá aviá pas assistit tanpauc a l’inauguracion de l’annada universitària per la meteissa rason. Mas dins l’acte universitari totes los representants del govèrn foguèron escridassats e los manifestants cantèron L’Estaca coma protèsta (vidèo). 

Si qu’assistiguèt a la Nuèch de l’Art lo primièr cònsol de Palma, Mateu Isern, que foguèt atissat amb de crits coma: “I a pas de cultura sens educacion!” e “Demission!”. Isern, de fach, poguèt pas intrar per la pòrta principala e aguèt d’intrar per la del bar. Lo vicepresident del Conselh Insular de Malhòrca, Joan Rotger, aguèt d’èsser escortat per la polícia quand volguèt sortir del local. 

Tanben i assistiguèron la presidenta del parlament, Margarida Duran; lo luòctenent-baile de l’economia de cort, Julio Martínez; lo luòctenent-baile de l’urbanisme, Jesús Valls; la deputada del PP Ana Maria Aguiló; e lo regidor de la cultura, Fernando Guillet. Totes foguèron fòrtament escridassats. 

Al costat d’aquela protèsta a Palma, “l’ondada verda” tanben se faguèt veire dins d’autres ponches de las illas, coma davant la comuna de Maon (Menòrca) o la de Sant Josep (Eivissa).

 

Los manifestants cantan L’Estaca davant lo rectorat de l’Universitat de las Balearas. 

Font: Assemblada dels Docents de Pollença

 

 Seguirem endavant, imne de la lucha dels professors de las Illas Balearas

[Poblejat dins www.jornalet.com]

---