Manuel Valls fiulat e tractat de “faissista” per carrièras a Orlhac

Lo ministre de l’Interior francés, Manuel Valls, foguèt fiulat qualques minutas per carrièras a Orlhac, ont èra anat dimècres passat per vesitar lo Festenal Internacional del Teatre de Carrièra.

Lo mond li cridèron: “Totes sèm de ròms!”, “Valls faissista”, “Aquò es lo retorn de Sarkozy”, e quitament li cantèron de cançons revolucionàrias en espanhòl, en interpretant espanhòla son origina catalana.

Los comediants an volgut manifestar aital lor refús de las politicas de Valls per rapòrt als gitanos e a las personas immigradas.

“Aqueste festenal es una òda a la cultura, al terraire, e aviái enveja dempuèi longtemps de partejar vòstre engatjament”, çò diguèt Valls als organizaires, en fasent coma se res s’èra pas passat.

Lo blòg Théâtre et Balagan n’a fach una cronica detalhada, del temps que lo jornal La Montagne n’a fach un vidèo.

[Poblejat dins www.jornalet.com]