Cap a una television occitana en occitan

Lionel Buannic ne parlèt
als mèdias de la FIMÒC

Se tot marcha coma cal, dins un tèrme de temps rasonable los occitans aurem, pel primièr còp, una television occitana facha integralament en lenga occitana. Òc Tèle es lo nom del projècte televisiu que lo mena lo breton Lionel Buannic, un jornalista qu’a ja fòrça experiéncia dins lo sector de la television en lengas minorizadas perque participèt activament als projèctes TV Breizh e BrezhoWeb. Aquesta darrièra cadena de television foguèt la primièra television regionala a signar un acòrdi amb lo Conselh Superior de l’Audiovisual (CSA).

 

Òc Tèle emetrà solament per Internet, çò que redusís de còstes per rapòrt a la television convencionala. Lo projècte, malgrat que pòsca semblar tròp innovaire, s’inscriu dins l’avenir de la television. Per exemple cal dire que la television en breton per Internet arriba a un public mejan de 60 000 espectators.

 

L’idèa es que la nòva cadena faga d’emissions jornadièras entre 18h00 e 22h00. La cadena cèrca d’èsser normala, es a dire qu’aurà d’informatius, de debats, de comèdias e de dessenhs animats pels mai pichons. La nòva television comptarà amb mai d’un centre d’operacions; se sa sedença serà ben a Lescar (Bearn), al sit de la FIMÒC, aurà una delegacion a Tolosa e una autra en Peiregòrd.

 

En de declaracions al jornal Sud-Ouest, Buannic expliquèt qu’espèra comptar amb sèt trabalhadors fixes e amb mièg centenat de collaboradors extèrnes. Lo projècte compta amb lo sosten de divèrsas institucions regionalas occitanas, coma la region d’Aquitània o lo conselh general dels Pirenèus Atlantics.

 

De segur aquesta nòva, se se confirma amb de faches, serà una novetat excellenta que servirà a enfortir lo petit espaci occitan de comunicacion. La còla de Jornalet saludam los promotors de la nòva television, los encoratjam en lor tòca e nos metèm a lor absoluda disposicion per çò que calga. 

[Image: © Paraulas en Òc - poblejat dins www.jornalet.com]