L’occitan fèi son entrada dens lo tram de Bordèu

Praus qu’an coneishut l’ambient de l’aire Chaban-Delmàs, la novèla sembla una petita revolucion: l’occitan fèi son entrada dens lo tramvai de Bordèu. Segur, ende començar, es d’una faiçon ben modèsta que la lenga pròpria de Bordèu poirà estar ausida capvath las estacions de la TBC (Tram e Bus de la CUB).

 

Dens lo quadre de l’Estiu Metropolitan, larg projècte d’accion culturau volut per la Comunautat Urbana de Bordèu (CUB) los mes de junh, julhet e aost, 22 messatges de benvenguda dens 22 lengas diferentas, totas parladas dens la CUB, esturen enregistrats. Seràn difusats a la coda-li-coda dens lo tramvai a ringlants jorns. Mercís a la volontat dau director de l’IEO 33-Ostau Occitan, Patrici Formage, qu’estut convengut que l’occitan i seré representat.

 

Sembla estar una evidéncia, mès lonh d’aquò, es au contra un eveniment màger encara gaire imaginable i a petit de temps. Aqueth messatge, enregistrat a duas votz (volontat de l’organizacion), desira la benvenguda aus visitaires de la CUB en gascon bordalés. Una gojata de la Calandreta de La Dòna, a Peçac, e Dàvid Escarpit, ensenhaire d’occitan a l’IEO, esturen los qui prestèren sa votz per l’enregistrament dau messatge.

 

A maugrat que la comunicacion de la CUB sus aqueth projècte empleguèssi lo tèrme malurós de “lengas estrangèiras”, sens enlòc precisar que l’occitan, lonh de n’estar, es au contra la lenga dau país, l’iniciativa merita d’estar egau saludada a causa dau tabó que permet de capvirar, e de la lei dau silenci, enfin chambertada. L’enregistrament se pòt trapar ací.

 

L’idèa es qu’aqueth permèir assai pusqui dubrir la pòrta au projècte màger pertocant l’occitan dens l’espaci public bordalés: l’enregistrament de las estacions de las tres linhas de tramvai de la CUB integrament en occitan. Los noms de las estacions son ja restaurats, e la lista espèra adara au burèu de Vincenç Feltesse, president de la CUB, en qui los occitanistas bordalés plaçan frem d’espèrs.

 

Lo projècte hèi partida daus chantièrs daus mes venents a Bordèu. Lo Pòrt de la Luna es tornat dens son país.

 

 

 

Dàvid Escarpit

[Image: © NeiTech - poblejat dins www.jornalet.com]