Carga policièra a Pampalona per empedir un drapèl basco gigant

se despleguèt lo drapèl basc gigant
en lo fasent penjar davant la façada
 de la Comuna                                                  

Las fèstas de Sant Fermin an començat ongan amb d’incidents. Ièr, dissabte de matin, a l’ora de l’inauguracion, un passacarrièra anava cap a la Plaça de la Comuna de Pampalona amb un drapèl basco gigantàs, mas un cordon de polícia los empedissiá d’i accedir.

Txelui Moreno, pòrtavotz basquista,
agredit per la polícia                                                 

Los manifestants cridavan “Los presonièrs bascos al Bascoat” e “Independéncia”. I aguèt de tensions, coma se vei dins lo vidèo que podètz veire çai jos; la polícia batèt qualques personas, e demest los ferits i a lo pòrtavotz de l’esquèrra abertzale Txelui Moreno, que recebèt de còps fòrts mentre qu’ensajava de parlar amb los policièrs. Fin finala, capitèron d’intrar dins la plaça.

Txelui Moreno, pòrtavotz basquista,
agredit per la polícia

Pauc abans miègjorn, amb tota la plaça plena e en esperant lo “txupinazo” (la fusada que marca lo començament de las fèstas), un grop de gents despleguèt lo drapèl basco gigant en lo fasent penjar davant la faciada de la comuna, tengut per de còrdas qu’anavan d’un balcon a un autre de la plaça. La comuna volguèt pas lançar la fusada fins que se retirèsse la bandièra, e lo “txupinazo” arribèt en retard, quand lo drapèl i èra pas mai.

Las fèstas de Sant Fermin de Pampalona son conegudas dins tot lo Mond, e l’accion dels basquistas es estada raportada per fòrça mèdias.

[Poblejat dins www.jornalet.com]