Far lo pastor dempuèi l’ecran d’un ordenador

Lo projècte pilòt e-Pastura permetrà que los pastors dels Pirenèus pòscan contrarotlar lors avers a distància, dempuèi l’ecran d’un ordenador o gràcias a de dispositius portatils coma de tauletas o d’esmartfòns.

Las nòvas tecnologias de l’informacion e la comunicacion son a revolucionar lo noirigatge. Un bon exemple d’aqueles cambiaments es lo projècte pilòt e-Pastura, que cèrca d’ajudar als pastors pirenencs per lo contraròtle dels tropèls.

Per mejan de colars dotats de sistèmas de geolocalizacion via satellit, los pastors poiràn obténer de donadas sus l’estat de santat dels caps de bestial, e tanben lor emplaçament. Al delà, amb aquel projècte pilòt se vòl tanben trobar la faiçon d’interagir amb l’aver, mejançant de senhals coma de sons, de vibracions o d’impulsions electricas, per influir dins l’emplaçament del tropèl e lo menar endacòm a distància. Aquò evitariá l’installacion de barrièras fisicas, en preservant lo païsatge e en estalviant de còstes.

La primièra fasa d’experiment s’es facha al Prat d’Albis, a Praiòls (País de Fois-Seron), e la segonda se debanarà en 2014 al Bascoat.

E-Pastura es un projècte pilòt dedins lo projècte de cooperacion transfrontalièra AGRIPIR.

[Image: © Aurélien Le Metayer - poblejat dins www.jornalet.com]