De manifestacions multitudinàrias dins las principalas vilas de Brasil contra las politicas del govèrn
Pendent la celebracion de la Copa Confederacions de fotbòl, qualques
centenats de milièrs de brasilièrs prenguèron tornarmai las carrièras de
las principalas vilas diluns de ser per protestar. Lor lista de planhs
es longa: la qualitat dels servicis medicals e de l’educacion, la
corrupcion, los còstes d’organizar la Copa Confederacions e la Copa del
Mond de fotbòl, e los Jòcs Olimpics, la pojada dels prèses del transpòrt
e l’excès de violéncia de la part de la polícia.
Las mobilizacions comencèron a São Paulo fa dètz jorns, amb una
manifestacion d’aperaquí 1500 personas contra la pojada del prètz del
transpòrt public. Mas a l’ora d’ara se son estendudas dins tot lo país.
De fach, ja se considèra que son las manifestacions mai importantas dels
darrièrs vint ans en Brasil.
La protèsta mai multitudinària se debanèt a Rio de Janeiro. Los mai de
cent mila indignats ensagèron d’arribar a l’Estadi de Maracanã, ont
dimenge i aguèt ja d’afrontaments amb la polícia abans la partida
Itàlia-Mexic de la Copa Confederacions. Pauc après, un autre grop de
manifestants anèt cap a l’Assemblada Legislativa; ailà los policièrs
empleguèron de gases lacrimogèns contra los manifestants. Qualques unes
respondèron amb de coctèls Molotov. Dins las autras vilas, las
manifestacions se son debanadas sens incidents remarcables.
“Mens d’argent per la Copa del Mond, mens d’argent per las entrepresas
de construccion, e mai d’argent per las escòlas e pels espitals”, çò an
revendicat los indignats qu’an manifestat tanben a São Paulo, Brasília,
Belo Horizonte, Porto Alegre e Belegam, e dins d’autras vilas
brasilièras.
La presidenta del país, Dilma Rouseff, a dich que los joves an drech de
manifestar s’o fan pacificament. Lo secretari general de la Presidéncia,
Gilberto Carvalho, a anonciat que lo govèrn vòl dialogar amb los
organizaires de las protèstas per saber qualas son las revendicacions
qu’an menat tantas personas a manifestar.
Los mèdias del país parlan de susmautas, d’incendis de veituras, d’atacs
de bancas e de botigas. Los movements socials planhon qu’aqueles
mèdias, que presentan coma legitimas las protèstas de Turquia, presenten
lor movement dels indignats brasilièrs coma de vandals.
[Images: Colectivo Dignidad - poblejat dins www.jornalet.com]
Sem comentários:
Enviar um comentário