Lo govèrn bolivian protegirà totas las lengas autoctònas que se parlan
en Bolívia. Los bolivians poiràn recebre una educacion dins las lors
lengas mairalas.
 |
| Govèrn de Bolívia |
Lo govèrn de Bolívia a fach un pas endavant per protegir la siá
culturala en aprovant la Lei Generala dels Dreches e Politicas
Lingüisticas, que foguèt promulgada pel president bolivian, Evo Morales,
lo 2 d’agost passat a Sucre, en escasença del Jorn de la Revolucion
Agrària e Comunautària. Aquela lei es destinada a “reconéisser,
protegir, promòure, divulgar, desvolopar e regular los dreches
lingüistics individuals e collectius” dels bolivians, çò diguèt Roberto
Aguilar, ministre de l’Educacion de Bolívia.
La lei visa de recuperar e reviscolar las lengas oficialas en perilh de
desaparicion. Las lengas oficialas en Bolívia son 37: lo castelhan e 36
lengas autoctònas de las diferentas nacions indigènas del país. Las mai
estendudas son lo quíchoa, l’aimara e lo guaraní.
Los ciutadans bolivians auràn drech d’emplegar la lor lenga mairala de
faiçon orala e escricha, de ne recebre l’educacion, d’aver lo lor nom
dins la lor lenga e de demandar qu’en de situacions oficialas lor sián
explicats los lors dreches, las lors obligacions e d’autres aspèctes
legals. An tanplan lo drech de preservar la lenga e la cultura que i
apertenon.
Aqueste article ven del jornal aragonés Arredol, amb qui Jornalet a un acòrdi de cooperacion.
[Font : www.jornalet.com]
Sem comentários:
Enviar um comentário