sexta-feira, 20 de janeiro de 2017

L’estat espanhòl deurà indicar se considèra que lo catalan e lo valencian son la meteissa lenga o pas

Dos avocats catalans an forçat l’administracion publica a abandonar son ambigüitat sus las denominacions d’aquela lenga




Dins las setmanas avenidoiras, l’estat espanhòl deurà abandonar son ambigüitat lingüistica e dire publicament se considèra que lo catalan e lo valencian son la meteissa lenga. O deurà far gràcias a dos avocats de Barcelona, Joan Vall e Josep Maria Vendrell, qu’an ganhat una accion judiciària al Conselh de las Lengas Oficialas dins l’Administracion de l’Estat, un organisme de l’estat espanhòl creat l’an 2008 que sa tòca es de garentir lo compliment de la nòrma lingüistica dins l’administracion publica.
 
“O avèm fach per indignacion. Perque n’avèm un confle qu’òm nos prepause doas denominacions d’una lenga que totes sabon que son la meteissa”, çò explica Vall a VilaWeb, en tot precisar que remarquèt que qualques sits web de l’administracion publica espanhòla permeton d’emplegar lo catalan e lo valencian coma opcions diferentas, mentre que d’autres sits prepausan l’opcion catalan/valencian.
 
Basicament, Vall a aprofechat sas coneissenças legalas per metre lo ponch final a un debat qu’a pas cap de basa ni scientifica ni legala. I a pas cap de lei que diga que lo catalan e lo valencian son de lengas diferentas. I a solament las denominacions desparièras dels estatuts d’autonomia, que dins lo cas del Principat de Catalonha e de las Illas Balearas  la lenga s'apèla “catalan”, del temps que l’estatut d’autonomia del País Valencian nomena la lenga coma “valencian”. Mas l’Acadèmia Valenciana de la Lenga (AVL), qu’es l’organisme estatutari de la Generalitat Valenciana, a ja esclarit que son la meteissa lenga amb de denominacions diferentas.
 
Amb d’arguments d’aquela sòrta, Joan Vall e Josep Maria Vendrell depausèron una demanda a la delegacion del govèrn espanhòl en Catalonha. “Es un drech fondamental, e demandèri una explicacion rasonada suls motius d'aquela incoeréncia dins l’administracion publica”. Sa demanda passèt entre las mans de divèrses organismes: de la Direccion Generala dels Afars Autonomics a la Direccion Generala de Coordinacion de Competéncias amb las Comunautats Autonòmas e fin finala, al Conselh de las Lengas Oficialas dins l’Administracion de l’Estat.
 
Li donèron una responsa fòrça ambigua que disiá qu'o sometrián a la deliberacion e al debat lo jorn que se reünirián. “N'aguèri pro e lo 25 de mai tornèri depausar una demanda, qu'es la qu'es estat objècte de debat”, çò explica Vall. Après tres meses sens recebre cap de responsa, çò es lo temps limit que lo ten l’administracion per donar una responsa a una demanda, Vall e Vendrell entamenèron una procedura davant la Cort Superiora de Justícia de Madrid en demandant que se declarèsse que l’administracion aviá violat lor drech fondamental d’obténer una responsa rasonada a la demanda presentada.
 
Ara lo Conselh de las Lengas Oficialas dins l’Administracion de l’Estat a fins al començament de març per far un recors —“Cresi pas qu’o fagan”, çò ditz Vall—, e serà a partir d'alavetz que se dobrirà un periòde de trenta jorns per que donen una responsa oficiala que diga se lo catalan e lo valencian son, o son pas, la meteissa lenga.



[Poblejat dins www.jornalet.com]

Sem comentários:

Enviar um comentário