Max Nordau

Keridos amigos:

Mi emisyon de este djueves va ser sovre uno de los padres del syonismo, Max Nordau. En aparejando mi emisyon, tuve la sorpreza de ambezarme ke la kondenasyon del arte moderno komo “desjenerado” (entartete en alman) ke izo Max Nordau fue tomada por los nazis de Nordau afillu si era djudyo i syonisto. Komo lo dishe en mi emisyon, kale akodrarse ke Hitler era pintor, i es un grande pekado ke no se kedo kon esto.

Saludes a todos,

Edmond Cohen
Paris – Fransya

  

Max Nordau

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, el djueves a las 4 h 06 despues de mediudiya, ora de Fransya, sea kuando se kyere, kale klikar en el sityo de Radio J, i irse sovre las emisyones de despues de medyudiya.

http://www.radioj.fr/node/55

De otra parte, vos akodro ke el proksimo atelye de konversasyon de Vidas Largas se va tener el martes 11 de desyembre, en el Centre Communautaire, a las dos i medya (asta solo las tres, porke despues va ser la Siduta djenerala de Vidas Largas).

Esto dicho, oy vos vo avlar de un famozo padre del syonismo politiko, ke lavoro al lado de su amigo Theodor Herzl, sin kedar tan konosido de la djente ke Herzl, kyero avlar de Max Nordau.

Kyen era Max Nordau ? Kuando se eskrive kualkyer koza sovre el, syempre se amostra la mizma fotografiya de el, ande aparese, muy kebar, blanko de kaveyos, de sejas, de mustachos byen peynados, muy largos i derechos, de barva dividida en dos partes, eyas tambyen byen peynadas i kortadas.

https://upload.wikimedia.org/wikipedia/commons/1/14/Portrait_of_Max_Nordau.jpg

Kale saver por empesar ke Max Nordau en vedra ni se yamava Max ni se yamava Nordau. Nasyo en Pest, una parte de Budapest, kapitala de la Ungariya, en 1849, kon la alkunya de Südfeld. En kuanto a su nombre, meldi Simon Maximilian, i meldi tambyen Simha Mishka. Su padre, Gabriel Südfeld, era haham, i poeta ebraïko. Lo ke kyere dizir ke Nordau, ke dainda no se yama Nordau, mos vyene de una famiya djudiya sufu, i por esto empesa sus estudyos en una chika eskola djudiya. Ma despues se va en un liseo katoliko, i a la edad de 15 anyos, se alesha por entero del djudaismo. Es ke fue por ke era en un liseo katoliko ? Esto no esta eskrito en Wikipedia, ma a mi me parese ke puede ser una razon, kon tambyen, a kinze anyos, la rebuelta de esta edad kontra lo ke vyene del padre. Ama kyen save ? Puede ser es por otra razon ke no se save.

Despues del liseo se ambeza la medikeriya i se aze mediko. Ma en mizmo tyempo lavora komo gazetero, en primero en Budapest, i despues, en 1873, a la edad de 24 anyos, en Berlin. Aya es ke troka su alkunya en Nordau. Deke esta alkunya, no sé, ama lo ke es siguro, es ke no es una alkunya djudiya, i dinguno no va mas saver ke el es djudyo. Zaten se kaza kon una kristyana protestanta, i es embiyado en Paris komo korrespondante de la gazeta Die neue freie presse (la mueva gazeta libera) i va ser en Paris ke va bivir la mas grande parte de su vida, guadrando yene un atadijo muy fuerte kon la kultura almana. Se puede dizir ke no le kedo nada de su orijen djudiya. A la kontra, Nordau, komo su amigo i kolega Theodor Herzl, ke el tambyen era korespondyente en Paris de la misma gazeta Neue freie presse, es partezano de la asimilasyon, i el mismo bive komo asimilado. A lo manko esto es lo ke se kree, ma la vida lo va azer trokar. La vida, va ser el echo Dreyfus, ama dainda no estamos en esto. Antes del echo Dreyfus Max Nordau se aze konoser komo kritiko sosyolojiko, i eskrive munchas ovras en alman, la mas konosida, ma no la sola, syendo, en 1892, Entartung (desjeneresensya).

Entartung va ser una ovra ke lo va azer konoser i ke va ser muy kombatida. La idea de Max Nordau es ke, kon la influensa de autores ke kombate, i por empesar Nietszche i Wagner, ma tambyen Oscar Wilde, Ibsen o Zola, la sosyeta i sus valores se dezazen, i esto se ve, asigun el, por egzemplo, en el antisemitismo de Wagner, en el arte (ke portanto, en 1892, es dainda bastante klasiko, komparado a lo ke va ser en el siglo 20). Nordau, ijo de la Haskala, del siglo de las Luzes, se espanta de un aboltamyento a la epoka de antes estas luzes.

Por dizir la vedra, no tomi el tyempo de meldar este livro de Nordau, afillu si a sido trasladado en fransez, i lo ke vos esto dizyendo, lo travi de lo ke meldi sovre Wikipedia i otros artikolos. Por esto es ke no me vo apesgar sovre las ideas de Nordau, ma tengo yene de dizirvos ke fueron prezentadas por el autor komo syentifikas (no kale olvidar ke Nordau era mediko, i el konsidera esta desjeneresensya komo una hazinura mentala). Komo vos dishe, sus ideas van a ser pishin kombatidas por varyos syentifikos, por egzemplo Sigmund Freud, asigun el kual « se puede demandar si la utilizasyon del byervo desjeneresensya es de una kualkyer valor o si adjunta kualkyer koza a muestra konosensya ». Sus ideas van a ser kombatidas por los ke topan Nordau « reaksyonaryo », opozado al progreso de la sosyeta. En 1902, Victor Segalen, en su artikolo paresido en la revista Mercure de France « Les synesthésies et l’école symboliste » va a la kontra de las ideas de Nordau sovre el simbolismo.

Sin tener meldado lo ke eskrivyo Nordau, salvo en lo ke sita de el Victor Segalen en su artikolo, no es kolay para mi de darvos mi opinyon, ama yene tengo la gana de azervos parte de los penseryos ke tuve kon esto.

Primera koza ke mos dize Nordau, no sovre los artes ma sovre la morala, es ke la pyedrita de la morala tradisyonala kon las filozofiyas komo la de Niesztche, mos va yevar a negros rezultados. Sin mismo avlar de la primera gerra mundyala, lo ke fueron las matansinas del siglo vente kon Hitler i Staline, todos los dos adorados komo diozes por muchedumbres en deliryo, me parese dar razon, a lo manko sovre este punto, a Max Nordau. En 1892, los ke kritikavan a Nordau no puediyan endevinar lo ke se pasariya en el siglo vente.

Sovre la sigunda koza, la desjeneresensya de los artes, no topo ke los artes fueran tanto desjenerados en 1892. Ama es vedra ke, en 1892, los pintores impresyonistos paresiyan eskandalozos.

Lo ke ay de kuryozo, es ke los byervos « arte desjenerado », en alman entartete Kunst, fueron la manera de los nazis de avlar del arte moderno ke eyos aborresiyan. I esto es direktamente tomado de Max Nordau el djudyo. Es vedra ke kuando Nordau eskrivyo Entartung en 1892, dinguno saviya ke era djudyo, ama la koza se supo poko despues kuando Nordau se va aunir kon Herzl en favor del syonismo.

Yene la koza es kuryoza, i Wikipedia lo eskrive muy byen : « Es un paradokso ke los nazis tomaron el byervo entartete (desjenerado) de los eskritos del pensador djudyo Max Nordau, kuando el rejimen nazi metiya un punto de onor de echar afuera toda idea emetida por un intelektual djudyo, i ke la desjeneresensya teorizada por Nordau inkluiya, entre otros, el antisemitismo ».

Vos akodro, kerides oyentes, ke Adolf Hitler era pintor (ke pekado ke no se kedo a esto solo) i ke su pintura, ke se puede ver sovre internet, es bastante klasika.

Aki me vo kedar sovre las ideas de Max Nordau, afillu si me paresen muy interesantes, porke oy no son mas estas ideas ke izyeron de el un ombre famozo, ma su lucha en favor de un syonismo politiko, al lado de Theodor Herzl.

Ya vos dishe ke Max Nordau i Theodor Herzl biviyan los dos en Paris komo korespondyentes de la misma gazeta de Vienna, i ke se konosiyan i puede ser ya eran amigos. Lo ke es siguro, es ke Nordau, a la diferensya de Herzl, era un djudyo tan asimilado ke ya se teniya olvidado ke era djudyo.

Lo ke les va amostrar al uno komo al otro ke son djudyos, i ke lo van a kedar, ke lo kyeran o no, es el echo Dreyfus ke empesa a fin 1894, i lo ke este echo va amostrar a los dos amigos de la vyolensa del antisemitismo en Fransya. No esto avlando del antisemitismo famozo desde muncho tyempo en Almanya, en Evropa del este, en Rusiya. Esto avlando de la Fransya, patria de los Derechos del Ombre.

En 1894, solo unos kuantos mezes antes ke empese el echo Dreyfus, Herzl eskrive una pyesa de teatro intitolada « El Muevo Ghetto ». Esto mos amostra ke, a la kontra de Nordau, Herzl se akodra ke es djudyo antes del echo Dreyfus ; ama mos amostra tambyen ke, dos anyos antes de eskrivir su famozo livro Der Judenstaat, Herzl es dainda leshos del syonismo. Ma se alesha tambyen tan de la asimilasyon komo de la konversyon, kree solo ke kale ovrar en favor de la toleransya i del respeto mutual entre djudyos i kristyanos.

Al kavo de este mismo anyo 1894, empesa el echo Dreyfus. No tengo oy la entisyon de kontar aki lo ke fue el muy largo echo Dreyfus, ke empeso por su kondenasyon a la fin de 1894 komo traidor, i ke korto la Fransya en dos, syendo ke se vido muy presto ke en vedra era inosente. Solo vos akodro los gritos de odyo kontra no tanto Dreyfus ke kontra los djudyos en jeneral, la djente demandando en las kayes « Muerte a los Djudyos ! » Ama no se keda solo kon gritos. Labori, avokato de Dreyfus, resivyo dos kurshumes en la espalda i por nes no fue matado, Zola, el eskrivano ke defendyo a Dreyfus fue atabafado kon su mujer, i los dos se muryeron, Dreyfus, despues de tener sido inosentado, resivyo un kurshum en el braso, Jaurès, ke se teniya metido de la vanda de Dreyfus, fue asasinado. Lo ke mos amostra ke el odyo de los djudyos i de sus amigos era un odyo mortale.

En sus livro « 70 figuras de Israël 1948 – 2018 » Jean-Pierre Allali i Haïm Musicant mos kontan ke en julyo 1895 Theodor Herzl se va ver a Max Nordau, a la vez komo amigo i komo mediko, dizyendole : « Mi amigo Schiff dize ke so loko. Es el psikyatro ke vengo a konsultar ». I Herzl empesa de kontar a Max Nordau lo ke pensa i ke salira el anyo de despues, 1896, en su livro Der Judenstaat (El estado de los Djudyos). Las ideas de Herzl son muevas para el, ama en vedra non son muevas, ya lo dishe munchas vezes aki. El primer syonisto moderno fue un haham Bosnyako de Serajevo, Yehuda Alkalaï, amigo del ke va ser el papu de Herzl ; despues de el uvo munchos otros, komo Los Hoveve Tsion, komo Leon Pinsker, komo Birnbaum ke va en 1886, por la primera vez, inventar el byervo syonismo. La koza egzistiya desde syempre : el psalmo 137 kon el famozo pasuk « si te olvido, Yerushalayim, ke mi derecha me olvide », pasuk ke dize el hatan kuando se kaza i rompe una kupa de vidro ; Yehuda Halevi eskrivyo los Shire Tsion (los kantos de Tsion) en el siglo 12, Joseph Nasi aprovo de fraguar una komunita djudiya en Tverya en el siglo 16, estos todos ya eran syonistos, afillu si el byervo no egzistiya. I desde 1886, el byervo egziste. Herzl ni invento la idea, ni invento el byervo. Ma tyene una egzaltasyon, una veluntad ke lo aze pasar por loko : pensa ke la unika solusyon para salvar el puevlo djudyo es ke tenga un estado, ke kale fraguar sin asperar. I esto es lo ke da a entender a su amigo i mediko, durante tres diyas en sira. I al kavo Herzl le demanda : « ke pensas? loko so, no ? » I Nordau, asimilasyonisto tres diyas antes, ma chapteado el tambyen por el antisemitismo amostrandose kon tanta fortaleza en Paris, responde a Herzl : « Si loko sos, semos dos. Esto kon ti ! »

I de este diya Nordau va amostrarse fiyel kompanyero de lucha de Herzl.
La djente deskuvre ke el famozo Nordau es djudyo, lo ke no se saviya, i en djuntos kon Herzl, ke entremyentres eskrive i sale en 1896 Der Judenstaat, los dos van a lavorar a aparejar el primer kongreso syonisto, ke va tenerse en Basel en 1897. Me esmovi muncho kuando me ambezi ke, entre la poka djente ke estava en el muzeo de Tel Aviv el 14 de mais 1948, diya ande Ben Gurion fundo el muevo estado yamado Israel, aviya vyejos syonistos ke aviyan partisipado, kuando eran mansevos, a este kongreso de 1897, 51 anyos antes…

Kale saver ke la idea mizma de tener un kongreso demokratiko es una idea de Nordau, ke va konvenser a Herzl, ke por su lado pensava mas a una gazeta djudiya i a una Sosyeta de Djudyos mas elitista, kargada de espandir la idea del syonismo.

Nordau va tenerse syempre al lado de Herzl en todos sus esfuersos, i en los kongresos despues de 1897.

Max Nordau sige Herzl kuando, despues del pogrom de Kichenev en 1903, bushkan, no mas el Tsion de los suenyos de Yehuda Halevi, ma solo lo ke Nordau va yamar un « azilo de noche ». Los inglezes azen a los syonistos la propozisyon de un tal azilo en Uganda. Al mal de sus pezar, Herzl i Nordau achetan la idea, no para syempre ma solo para empesar, ma kuando azen esta propozisyon al sejen kongreso syonisto, en agosto 1903 en Basel, no solo los djudyos rusos refuzan mismo la idea – se asentan en basho por luto de Tsion – ma mismo un estudyante djudyo ruso trava sovre Nordau, gritando « muerte a Nordau el Afrikano ! » Esto no va matar a Nordau, ama yene ferirlo, salvo ke el ke va morir de kanseryo i puede ser de dezespero no va ser Nordau, va ser Herzl un anyo despues, en 1904, a solo 44 anyos.

Despues de la muerte de Herzl, Nordau se trava mas o menos de la politika de los otros kongresos, ma no se alesha del syonismo. Kyere un ombre djudyo fuerte en un estado fuerte. Kyere eskapar su vida en Erets-Israel, ma se muere antes de pueder azer su viyaje, en 1923, serka de 20 anyos despues de su amigo Herzl.

Su puerpo, tres anyos despues, en 1926, va ser yevado en Palestina para ser enterrado en Tel Aviv, ke se akodra de el kon su Sderot Nordau (Boulevard Nordau, entre la kaye Hayarkon i la kaye Shlomo Ibn Gevirol, otro amante de Tsion, ma del siglo 11) .

Al djueves ke vyene, si kyere el Dyo !

Edmond Cohen
Paris, Fransya

[Orijen: www.esefarad.com]