Desestimada a demanda contra Bob Dylan polos dereitos do tema «Hurricane»

A viúva de Jacques Levy, que axudou a escribir a canción «Hurricane», afirma que se lle debe unha parte dos fondos obtidos pola venda do seu catálogo

Unha corte de apelacións de Nova York refugou o caso presentado contra Bob Dylan pola viúva do colaborador que axudou a escribir a canción Hurricane, quen afirma que se lle debe unha parte dos fondos obtidos pola venda do seu catálogo a Universal Music Publishing.

Tal e como informa Efe, a denunciante presentouse un mes despois de que Dylan vendese en decembro de 2020 as súas cancións por un monto, segundo algunhas fontes, próximo aos 400 millóns de dólares.

A viúva de Jacques Levy, Claudia Levy, esixiu nos tribunais o pagamento dunha parte desa cantidade, en concreto 7,25 millóns de dólares, presentando como argumento un acordo asinado en 1975 entre Dylan e o seu marido, que colaborara na composición da canción Hurricane e doutros nove temas que pertencen ao álbum Desire (1976).

Hurricane é a canción máis famosa dese disco, e conta a historia do boxeador negro Rubin Carter, inxustamente acusado dun triplo homicidio nun caso que se converteu en emblemático dos dereitos civís; considérase que o eco da canción axudoulle a conseguir unha nova sentenza e saír do cárcere.

O pasado mes de agosto, un xuíz xa emitiu unha sentenza que sinalaba que, baixo o contrato de emprego asinado entre ambos os artistas, Levy renunciara aos seus dereitos de autor e outorgoullos por completo a Dylan, pero Claudia Levy apelou esa decisión a finais de 2021.

Os avogados de Dylan afirmaron entón que a acción legal non era máis que un «intento oportunista» ante a posibilidade de obter un «diñeiro caído do ceo».

Este martes, unha corte neoiorquina de apelacións mostrouse de acordo coa decisión xudicial orixinal, e apuntou que o acordo entre Dylan e Levy era «inequívoco», e que non daba dereito ao denunciante a recibir «unha parte dos fondos obtidos coa venda dos dereitos de autor».

Tras esta sentenza, Claudia Levy ten unha última oportunidade de presentar outro recurso, polo que a sentenza aínda podería ser revertida, aínda que este extremo é pouco común.

 

[Imaxe: Domenech Castelló - fonte: www.lavozdegalicia.es]