Lo cap de la polícia catalana se daissèt pas tòrcer davant las protèstas dels jornalistas ispanofòns quand emplegava la lenga catalana. Sa reaccion es venguda de mòda
Lo fach que s’empleguèsse tanben la lenga catalana dins una conferéncia de premsa per explicar l’accion policièra après los atemptats de Barcelona e Cambrils provoquèt una reaccion de colèra de qualques jornalistas espanhòls ispanofòns, que torcèt pas brica lo major dels Mossos d’Esquadra, la polícia catalana, Josep-Lluís Trapero.
En seguida de las protèstas dels jornalistas ispanofòns quand Trapero respondiá a de questions en catalan, Trapero ensagèt d’explicar sa causida lingüistica. “Respondi en catalan las questions que las me pausan en catalan, e en espanhòl las questions que las me pausan en espanhòl”. Mas en vesent que las protèstas contunhavan e qu’un jornalista madrilenc quitava la sala, la responsa de Trapero foguèt neta e clara, en mesclant catalan e espanhòl: “Bueno, pues molt bé, pues adiós” (“ben, doncas fòrça plan, doncas adieu-siatz). Aquela reaccion es estada fòrça saludada. Se fa de camisetas e de pegasolets amb l’imatge de Trapero e sa frasa, qu’es venguda de mòda mondialament suls rets socials.
Trapero compareguèt diluns passat davant los mèdias acompanhat del conselhièr de l’Interior de la Generalitat de Catalonha, Joaquim Forn, e del conselhièr de la justícia Carles Mundó. Expliquèron al detalh lo trabalh que l’a fach la polícia de Catalonha après los atemptats que patiguèron dijòus passat Barcelona e Cambrils amb un tragic bilanç de 15 mòrts. Respondèron a las questions dels jornalistas, en espanhòl a las questions pausadas en espanhòl e e catalan a las questions pausadas en catalan. La conferéncia de premsa seguissiá una declaracion del president catalan, Carles Puigdemont, prononciada en catalan, espanhòl, anglés e francés.
#BuenoPuesMoltBéPuesAdiós tuits
[Poblejat dins www.jornalet.com]
Sem comentários:
Enviar um comentário