Amassa 1264 intradas amb d’informacions de fòrça lengas de la planeta, e la denominacion de cada intrada es donada en 18 lengas dont l’occitan
Lo 24 de febrièr passat, dins l’encastre del Jorn Internacional de las Lengas Mairalas, se presentèt a Barcelona lo Diccionari de las lengas del Mond, qu’amassa 1264 intradas amb d’informacions sus las lengas que se parlan sus tota la planeta. La denominacion de cada lenga es en catalan e tanben en 18 lengas dont l’occitan (amb d’errors ça que la). E mai s’ofrís lo nom de la lenga escrich dins aquela lenga meteissa. Atanben, se rapòrta la filiacion lingüistica de cada lenga, lo luòc ont se parla, sa situacion sociolingüistica, sa vitalitat, d’aspèctes istorics, etc.
Las donadas d’aquel Diccionari de las lengas del Mond venon del trabalh menat a tèrme per LinguaMón, lo CIEMÈN e lo Grop d’Estudi de las Lengas Menaçadas de l’Universitat de Barcelona (GÈLA).
Aquel diccionari en linha fa partida del Termcat (un consòrci de la Generalitat de Catalonha, l’Institut d’Estudis Catalans e lo Consòrci per la Normalizacion Lingüistica) e a la tòca de garentir lo desvolopament e l’integracion de la terminologia en catalan, qu’es la referéncia per las publicacions scientificas e tecnicas. Lo Termcat a fach en occitan lo lexic: Societat de l’informacion. Novèlas tecnologias e Internet.
[Image: Carme Queralt - poblejat dins www.jornalet.com]
Sem comentários:
Enviar um comentário