La publicitat deu far possible Jornalet

Lo vidèo publicitari de Jornalet legís las paraulas d’una cançon dels de Sauvatèrra, qu’exprimisson clarament quala es la nòstra tòca: balhar de dignitat a “una lenga vièlha que se vòl pas calar”.

Fa un an e mièg que Jornalet se metèt en marcha, e contunha d’aver mai de legeires cada jorn. Aperaquí 600 legeires per jorn an legit las nòvas e las opinions d’aqueste mèdia en agost. Cal dire qu’an vesitat aqueste sit mai d’80 000 usatgièrs unics, segon Google Analytics.

Aquelas donadas talament optimistas nos donan lo vam necessari per far cada jorn lo Jornalet. E mai s’encara nos arriba pas pro d’argent per qu’aqueste trabalh quite d’èsser benevòl.

Es la publicitat que deu portar la rendabilitat de la premsa occitana. E es aquí que fasèm una crida. Se coneissètz un productor de vin o de fetge gras, un ofici de torisme, un elegit occitanista, una ostalariá, una botiga per Internet o lo responsable de France Telecom; mostratz-lor las tarifas de publicitat de Jornalet e engatjatz-los a se far conéisser dins aqueste mèdia vivent (tanben n’avèm en francés). Ganharàn un molonàs d’amics e benlèu de clients. Cal apondre que las tarifas de publicitat an un prètz orientatiu e nos adaptam totjorn al budget de cada organisme.

S’en mai d’aquò volètz far un don, serà mai que benvengut.

[Poblejat dins www.jornalet.com]