segunda-feira, 15 de setembro de 2025

China impausa lo mandarin per «afortir l’unitat»

La revision de las leis lingüisticas en China impausa lo mandarin coma lenga unica, menaçant las lengas e identitats de las minoritats etnicas 


China ven de revisar doas proposicions legislativas dins l'encastre de sa campanha per promòure «l'integracion etnica» per l'utilizacion del chinés mandarin estandard, tant a l'oral coma a l'escrich, demest los grops minoritaris, çò rapòrta lo South China Morning Post

Lo projècte de lei de promocion de l'unitat etnica, presentat davant lo comitat permanent de l'Assemblada Nacionala Populara (ANP), soslinha «la necessitat urgenta» d'afortir lo sentiment d'apertenéncia a la nacion chinesa e d'identificar l’unitat nacionala per la lenga comuna. Aquela legislacion, qu'abòrda de questions talas coma l'identitat culturala comuna, l'integracion sociala, lo desvolopament economic e las responsabilitats juridicas, met tanben l'accent sus la promocion dels escambis interculturals. Aquò inclutz sustot la facilitacion de las interaccions entre diferentas culturas de China per d'iniciativas dins l'educacion, la cultura e lo torisme, per tal de refortir la compreneson mutuala e de promòure la diversitat culturala dins lo país.

Parallèlament, una revision de la lei sus la lenga chinesa estandard a introduch 32 articles destinats a aumentar l'usatge del mandarin dins totes los sectors, e mai los servicis publics, l'educacion, las comunicacions internacionalas e l'espaci numeric. Lo tèxt precisa que las variantas regionalas o etnicas del chinés estandard son pas pertocadas per aquela revision. L'objectiu d'aquela legislacion es d'unificar la lenga a l'escala nacionala.

Malgrat que lo govèrn meta endavant los avantatges d'una tala politica per afortir la coesion nacionala, de criticas soslinhan lo risc d'esfaçament de las culturas localas, coma s’obsèrva en Mongolia interiora, ont s’impausa de mesuras estrictas per integrar lo chinés estandard dins las escòlas. D’autras identitats etnicas, coma la dels tibetans o dels oigors, pòdon tanben percebre aquela politica coma una assimilacion culturala forçada e una marginalizacion de lors pròprias lengas e tradicions, refortissent aital las tensions dins de regions amb de culturas pròprias fòrtas.

Pasmens, lo govèrn insistís sus la necessitat de garentir lo drech dels ciutadans a aprene e far servir la lenga nacionala, en afortissent la «fisança culturala» dins la nacion chinesa. «Cap d'organizacion o individú empacharà pas los ciutadans d'aprene e d'utilizar la lenga comuna nacionala», çò disiá lo comunicat de Xinhua, l’agéncia estatala chinesa de nòvas. 

 

 [Imatge: www.planethanchinese.com - sorsa: www.jornalet.com]

 

 



Sem comentários:

Enviar um comentário