sexta-feira, 26 de maio de 2017

Parlar al país dins la lenga del país



Al País Valencian, lo catalan es ara la lenga veïculara e preferenciala de l’administracion. Coma o raportàvem dimenge passat, 14 de mai, lo govèrn de la Generalitat Valenciana a aprovat un decret que regula l’usatge preferencial del catalan —dich localament valencian— a totes los nivèls de l’administracion. A la fin d’aquela informacion, podèm veire un vidèo amb un parladís de la vicepresidenta valenciana, Mónica Oltra, ont confirma que los foncionaris devon començar las convèrsas en catalan. “Tu començas en valencian, e se la persona vòl perseguir en valencian te parlarà en valencian, e se vòl perseguir en castelhan te parlarà en castelhan, l’invèrs se fa pas normalament atal”.
 
Un comentari de Gerard Cairon remarca çò que ditz Oltra, convida los legeires a l’escotar e nos pausa una question. “E nosautres, cossí ensajariam pas de far començar las convèrsas amb de desconeguts en occitan?”, çò demanda Cairon. “E mai se, sovent, podèm pas començar d’abordar una persona en occitan (e encara!) que, al mens, ela sàpia que pòt parlar occitan amb l’interlocutor que li fa fàcia...”, çò precisa.
 
E mai s’es ultraminorizat en Occitània, l’occitan a absoludament la legitimitat de revendicar sa plaça dins la vida vidanta e nosautres avèm drech de parlar al país la lenga del país. Per aquela rason, dins aqueste editorial volèm saludar la proposicion de Cairon e encoratjar los legeires de Jornalet a abordar los desconeguts totjorn en occitan. Es pas complicat de començar una conversa dins la nòstra lenga. N’i a pro amb un simple “adieu-siatz”, o “adishatz” se i volètz portar un accent gascon. Malastrosament, dins la majoritat dels cases, nos respondràn dins la lenga dominanta, mas almens aurem donat a l’interlocutor l’escasença de comunicar dins la lenga del país. 



[Imatge: Guillem Sevilla - poblejat dins www.jornalet.com]

Nenhum comentário:

Postar um comentário