Catalonha: ara es disponibla en occitan l’aplicacion de las Guidas de Convèrsa Universitària

S’agís d’un esplech interactiu de frasas utilas dins divèrsas lengas e divèrsas situacions de comunicacion

Es ja disponible en occitan d’Aran l’aplicacion per telefòn mobil de las Guidas de Convèrsa Universitària (GCU), que las edita la Generalitat de Catalonha, segon çò que rapòrta lo Govèrn d’Aran.

 

Aquel esplech interactiu de frasas utilas, dins divèrsas lengas e divèrsas situacions de comunicacion, es una de las aplicacions mai emplegadas de las qu’a creat lo Govèrn de Catalonha amb mai de 41 000 usatgièrs. L’occitan aranés ven de s’incorporar dins aquelas guidas al costat de l’anglés, l’espanhòl, lo francés, l’alemand, l’italian, lo portugués, lo rus e lo chinés, segon un trabalh de traduccion fach per Xavi Gutiérrez.

 

Lo sindic d’Aran, Carlos Barrera, considèra qu’“aguesta accion enfortís era possibilitat de coneishença der aranés en encastre universitari catalan e ei un apondi important entara normalizacion sociau de coneishença e usatge dera nòsta lengua”.

 

Aquel esplech es tanben disponible en version web sul sit Intercat.cat, un sit tanben en occitan, ont las universitats catalanas amb la Generalitat de Catalonha amassan de ressorsas numericas per aprene la lenga e la cultura catalanas. 

[Poblejat dins www.jornalet.com]