Botan es un reialme d’Asia del sud amb qualques 750 000 abitants, qu’abans 2020 vendrà lo primièr país del Mond que totas sas culturas seràn ecologicas. O anoncièt lo ministre de l’Agricultura botanés, Pema Gyamtsho, dins la Cima del Desvolopament Sostenable, celebrada a Nòva Delhi (Índia) en febrièr passat.
Segon Gyamtsho, tre 2020 serà enebida la venda de pesticidas e
d’erbicidas quimics, e los païsans botaneses emplegaràn per lors
culturas solament de melhoraments organics naturals, obtenguts de lor
bestial.
Lo ministre, qu’es tanben agricultor coma qualques ministres de mai,
remarquèt los efièches nocius de l’usatge dels fertilizants quimics en
la qualitat dels aliments, per lor bassa valor nutricionala e la
contaminacion de las aigas sosterranhas.
De fach, a l’ora d’ara es ja aital dins la majoritat de l’argicultura
del país, pr’amor que tota aquela quimicalha es fòrça cara. En mai
d’aquò, lo trabalh tradicional dels païsans botaneses manten la qualitat
agricòla dels sòls.
L’estrategia del govèrn per manténer la produccion agricòla sens cap de
quimia es d’aumentar las tèrras irrigablas e emplegar de varietas
localas pr’amor que son mai resistentas a las plagas.
Amb aquela nòva lei, Botan a l’intencion d’exportar sas noiriduras
naturalas als grands mercats vesins de China e Índia. Mas aquela mesura
cèrca tanben d’afrontar lo problèma de la secaresa de las grandas
migracions de gents que quitan la campanha per anar dins las vilas.
[Image: Pressenza / Allpe - poblejat dins www.jornalet.com]
Sem comentários:
Enviar um comentário