Sephatrad: Bretanha: la cort d’apelacion de Rene autoriza lo prenom del petit Fañch Bernard

Après una naissença l’11 de mai de 2017, los parents se son deguts batre amb la justícia durant un an e mièg fins qu’ajan pogut oficializar lo prenom de l’enfant

@joleneroue

Lo pichon Fañch Bernard poirà, enfin, ortografiar oficialament son prenom coma cal après mai d’un an e mièg de lucha. La cort d’apelacion de Rene (en breton “Roazhon”) a autorizat que Fañch sèrve lo caràcter “ñ” dins son prenom après que lo tribunal de Kemper n’enebiguèt l’usatge en setembre de l’an passat, car es un “signe inconegut de la lenga francesa.

Ara, los jutges an dich que l’usatge de la letra “ñ” contraven pas a l’article 2 de la Constitucion francesa, qu’establís que lo francés es la lenga de la Republica, ni mai al “principi de redaccion de documents publics en lenga francesa”. En mai d’aquò, los jutges considèran que lo caractèr “es pas inconegut de la lenga francesa” car existís dins divèrses diccionaris e qualques decrets de nominacion, coma per exemple la del nòu secretari d’estat Laurent Nuñez.

Lo jove Fañch Bernard nasquèt l’11 de mai de 2017 a la maternitat de Kemper (Bretanha). L’enfanton es dempuèi sa naissença una victima de la repression lingüistica de l’estat francés, car a agut besonh que sos parents defendan l’ortografia de son nom durant un an e mièg de batalhas judiciàrias.

Complicat de s’apelar Jòrdi o Loís

Lo problèma que l’a patit lo petit Fañch per poder registrar oficialament son prenom, es que l’estat francés a decidit quals son los sols signes diacritics autorizats. Los faguèt conéisser dins una circulara datada del 23 de julhet de 2014 que se publiquèt al Jornal Oficial. Los signes permeses son solament los de la lenga francesa, es a dire à, â, ä, é, è, ê, ë, ï, î, ô, ö, ù, û, ü, ÿ, ç. Per tant, dempuèi lo 23 de julhet de 2014, l’estat francés autoriza pas de registrar de prenoms coma Jòrdi o Loís.