L’Assemblada francesa refusa la proteccion de las lengas minorizadas dins l’educacion e dins los mèdias publics

Lo parlament francés censurèt arser una proposicion de lei per l’immersion lingüistica e per la preséncia de las lengas autras que lo francés dins los mèdias publics

Per la ministra de la cultura francesa, 
Fleur Pellerin, i a ja pro de causas 
fachas per las lengas "regionalas" e 
i a pas cap de besonh de ne far mai

A l’entorn d’aquesta mièjanuèch passada, amb un emicicle gaireben voide, l’Assemblada francesa a votat contra l’immersion lingüistica de las lengas territorialas autras que lo francés. E a refusat de las promòure dins l’espaci public e audiovisual. Tretze vòtes favorables e catòrze contraris an pas permés de far avançar aquela proposicion de lei.

 
La proposicion de lei que se debatèt e que se refusèt l’aviá presentada lo deputat ecologista breton Paul Molac. L’an passat capitèron mal las negociacions per que l’estat francés ratifiquèsse la Carta Europèa de las Lengas Regionalas o Minorizadas, e après aquel assag mancat, Molac aviá presentat aquela proposicion de lei a per impulsar l’ensenhament immersiu de las lengas minorizadas e per las promòure dins l’espaci public e audiovisual.

Se cercava una reconeissença larga de l’ensenhament bilingüe

 
 

La 28 d’octòbre passat los senators de la drecha refusèron de discutir lo tèxt prepausat per Christiane Taubira, que defendiá la ratificacion de la Carta Europèa. Dempuèi aquel moment, lo deputat ecologista breton Paul Molac a trabalhat per preparar aquela proposicion de lei refusada ièr, que foguèt examinada lo 16 de decembre per la comission dels afars culturals e de l’educacion de l’assemblada.
 
Segon Molac, la proposicion cercava que se reconeguèsse largament l’ensenhament bilingüe e una proteccion de l’immersion lingüistica dins l’educacion: “Consistís a refortir l’usatge de las lengas regionalas [sic] dins los dos pilars de la politica lingüistica: l’ensenhament e la visibilitat dins l’espaci public e audiovisual”.
 
La tòca, segon Molac, èra “d’ofrir la possiblitat d’utilizar las lengas regionalas amb mai d’ample dins l’orari escolar, e puèi, d’ajudar a finançar l’ensenhament bilingüe dins las administracions territorialas competentas pels centres d’ensenhament general”.
 
 
Se demandava la preséncia destacada de las lengas minorizadas dins los mèdias
 
Molac insistís especialament sus la proteccion e difusion de las lengas minorizadas dins la television publica e los mèdias de servici public. Tanben quicha per la promocion de l’usatge social de las lengas territorialas autras que lo francés. Lo tèxt de Molac prepausava pereu d’apondre a la mission del Conselh Audiovisual un ròtle per contrarotlar l’assignacion d’un espaci destacat per las lengas e las culturas minorizadas dins totes los mèdias.

[Poblejat dins www.jornalet.com]