Un servidor de mapa en occitan

Après dètz ans de trabalh, l'IEO e OSM venon de lo metre en servici

L’Institut d’Estudis Occitans (IEO) e lo projècte collaboratiu de cartografia liura Open Street Map (OSM) venon de metre en servici un servidor de mapa en occitan.

La còla occitana a obrat amb los volontaris bretons qu’an agut l’iniciativa del projècte, e amb de bascos en tot prepausar un primièr ensag de portal geografic per las lengas territorialas de l’estat francés.

Après dètz ans de trabalh collaboratiu, en se conformant a la norma internacionala de las lengas ISO e IANA per intrar sus la mapa mondiala, la carta es publica sul sit Luòcs. Per ara, i a 24 213 toponims en occitan e la tòca es de cartografiar lo Mond entièr: “Nòstra amira aicí es de restituir dins la lenga locala, l’occitan, lei vias, lei rius, lei noms de luòc, de servicis, de bastiments…”.  Per o far, totòm i pòt participar.


Cossí i collaborar

Per collaborar amb lo projècte trobaretz d’explicacions, de tutorials, de vidèos e mai d’astúcias sul sit http://openstreetmap-oc.org/


Organizar de “mapejadas”

A mai, se prepausa d’organizar de “mapejadas”, çò es de jornadas de trabalh per cartografiar ensems dins un ambient convivial.

La pagina Facebook Geoccitània rapòrta l’avançament del projècte, l’actualitat, son avenir...






 

[Poblejat dins www.jornalet.com]