El sekreto del mudo

Por Yitshak Benrubi

Roman eskrito orijinalmente en ladino i trezladado al fransez, sovre los djudios de Saloniko deportados a Auschwitz. En los paragrafos ke traemos aki el Dr. Robert Kassen, un djudio fransez deportado el tambien a Auschwitz onde esta sirviendo de mediko, se topa kon Leon Errera, uno de los deportados de Salonik ke se amudesio al yegar a Auschwitz. Los dos estan en la infirmeria del kampo, serka de media noche, aprontando bandajes por orden del komandante, aun ke ya lavoraron todo el dia i estan muertos de kanseria.

Onze la ora de la noche. Los dos amigos estan abokados sovre el lavoro ke achetaron volontariamente por no apezgar mas la vida dura de sus desfortunados kompanyeros. Dr. Kassen mira, de vez en kuando, kon piadad, a su amigo de Salonik. El siente perfektamente, pensa Robert, i ay munchas posibilidades ke una fuerte emosion, una grande alegria, por exemplo, le aga retornar el uzo de la palavra.

Komo si uviera meldado el penserio de Robert, el mudo eskrivio en el papel: "Si puedia avlar vos iva kontar munchas koza sovre mi vida i sovre las ermozuras de Salonik, la sivdad de mi nasensia."

"Puede ser un dia vijitaremos ayi", respondio Kassen.

Leon Errera miro en alto, komo por demandar del Dio, de toda su alma, la realizasion de las palavras del doktor.

Este ultimo, todo en kortando i aprontando las tiras de savana ke el mudo embolvia en "rolos", pensava a todos los "suvenires" ke el biervo Salonik azia naser en su memoria. El se akodrava las palavras de su padre el kual, en la gerra del 1914-1918, avia servido en la "armada de Oriente" basho los ordenes del jeneral Sarrail. "Salonik - dizia su padre - es una ermoza sivdad fraguada en anfiteatro. En enverano la mar es kaje siempre kalma komo un lago. El sol o la luna se miran en eya komo en una grande tavla de plata. La tadre, kuando el sol se echa detras de la kadena de muntanyas del Olimpos, kolorando de sus ultimos rayos la espandidura de pinyaskos i de aguas, la alma del ombre parese enchirse de poezia i de majestad".

Robert serro los ojos por akodrarse mejor la facha inspirada de su padre kuando avlava de Salonik i de este enfichizante Oriente ke el tuvo vijitado. Una grande melankolia incho su alma: el no parvenia a echar este eskuro pensamiento, ke nunka mas vera a sus parientes bivos.

Enfrente, Leon Errera, kanso de 16 oras de lavoro sentia su kavesa apezgarse de mas en mas enriva sus ombros. Fin poko, penso el, ya sera media noche i ainda ay de asperar asta eskapar todo lo ke tenemos ke azer.

[Orijen: www.aki-yerushalayim.co.il]