Pau: un casting per joves comediants qu’ajan pas d’accent occitan

Lo realizaire Chad Chenouga farà un casting per un longmetratge ont se precisa que se “deu pas aver un accent del Sud-Oèst [de França]”

L’actor e realizaire de cinèma francés, Chad Chenouga, farà a Pau, los 26 e 27 de setembre, un casting per un longmetratge entitolat La Niaque, ont un dels requisits es d’aver pas d’accent occitan, particularament gascon, segon çò que rapòrta Sud-Ouest.

Dins l’encastre del rodatge d’aquel filme, que se debanarà aqueste ivèrn en Gasconha e a París, la còla del filme recèrca de joves actors per interpretar lo personatge principal e los segonds ròtles. Lo personatge principal, Nassim, es un jove d’origina maugrabina de 15 o 16 ans qu’es “viu d’esperit, audaciós e que se pòt mostrar arrogant”. Los segonds ròtles, Erwann e José, son de jovents de 12 a 16 ans “de tipe europèu”, coma tanben o es Lydia, de 14 a 16 ans, “una adolescenta de fòrta corpuléncia”. Se precisa que “L’actor deu pas aver un accent del Sud-Oèst [de França]”.

 [Font: www.jornalet.com]