La tòca es de permetre una reapropriacion de la lenga occitana dins la vida vidanta
 |
| La Seleccion Occitana de Fotbòl © Commando Sudiste |
L’Institut d’Estudis Occitans (IEO) a publicat dos lexics gratuits dedicats al rugbi e al fotbòl. Se tracta de dos vocabularis especifics e de las expressions, en comprenent una guida de pronóncia e una mapa d’Occitània amb los clubs professionals (Liga 1 e 2 pel fotbòl, Tòp 14 e Professional D2 pel rugbi de XV, Elèit 1 e 2 pel rugbi de XIII). De mai, aqueles libres contenon de cançons emblematicas que se cantan dins los estadis d’Occitània. La tòca d’aquela publicacion es de permetre una reapropriacion de la lenga occitana dins la vida vidanta.
La primièra edicion, de la fin de 2014, serà seguida per d’autras. Se prevei de los editar dins d’autres dialèctes e d’i integrar l’oralitat e de melhorar la presentacion amb de nòus imatges e fotografias.
Del costat del fotbòl, l’IEO a comptat amb la collaboracion de l’Associacion Occitana de Fotbòl (l’AÒF) e son entraïnaire, Deidièr Amiel. Del costat del rugbi, la collaboracion es venguda de la seccion d’Aude de l’IEO e de son animator Alan Roch, que publica cada setmana dins Jornalet la cronica del rugbi de XIII.
La tòca del libre es de reportar la lenga al país e dins aquel sens n’an fach una difusion importanta. Lo 24 de genièr a Carcassona, se repartiguèt lo libre durant l’encontre amistós de rugbi de XIII dels Dracs catalans e dels Cavalièrs Catars, e lo 30 de decembre a l’estadi del COAT de Tolosa se repartiguèt a l’ocasion de la partida de fotbòl entre la Seleccion Occitana e la de l’Illa de Man, qu’Occitània i ganhèt 5 a 1.
Se pòt trobar los lexicòts dins cada seccion de l’IEO o se pòdon anar cuélher a la sedença nacionala de l’IEO, 11 Carrièra Malcosinat a Tolosa. Tanben ne podètz comandar per e-mail.
Informacions:
— Format: 8,5 x 16 cm
— Fotbòl: 28 paginas
— Rugbi: 32 paginas
[Poblejat dins www.jornalet.com]
Sem comentários:
Enviar um comentário