Manuel Valls: “nos cal pas aver paur de las lengas regionalas”

Lo ministre de l’interior francés se manifestèt tanben “inquiet” a prepaus del procès independentista catalan, dins sa vesita en Bretanha

“Nos cal pas aver paur de las lengas regionalas”, çò diguèt divendres passat Manuel Valls a Kemper (Bretanha). Lo ministre francés de l’interior anonciava aital l’engatjament de François Hollande de ratificar la Carta Europèa de las Lengas Regionalas o Minoritàrias. Dins aquel sens, lo ministre diguèt qu’Hollande deviá “trobar una majoritat per o poder far”, segon çò que raportèt Ouest France.

Interrogat pels jornalistas a prepaus del referendum d’independéncia de Catalonha, Valls diguèt qu’èra “pas d’acòrdi” e se diguèt quitament “inquiet”. En seguida revendiquèt la posicion de l’istoriana Mona Ozouf, filha de nacionalistas bretons, que se ditz 100% bretona, 100% francesa e 100% republicana.

Per çò qu’es del movement dels bonets roges, Valls demandèt de temps. “L’ecotaxa es suspenduda, pas suprimida, e avèm una reflexion generala sus la fiscalitat. Donatz-nos de temps”, çò respondèt lo ministre francés.

Valls vesitèt Bretanha dijòus e divendres passats amb una agenda tota plena d’activitats.

[Poblejat dins www.jornalet.com]