Hoji Takahashi es un òme japonés de 71 ans qu’a
fach sa denóncia, dimars passat, contra la television japonesa e que
reclama una indemnizacion d’1,41 milions de ièns —aperaquí 10 100 èuros—
perque l’emplec excessiu de mots estrangièrs l’empedís de comprene los
contenguts e lo fa venir malaut d’angoissa.
“Ensagèri de contactar NHK per aquel motiu, mas i aguèt pas cap de
responsa, alavetz decidiguèri de menar aquò als tribunals. Vòli que la
cadena prenga en compte que i a d’espectators vièlhs coma ieu quand es a
preparar los sieus programas”, çò disiá a l’agéncia Kyodo.
Lo retirat considèra que la cadena NHK emplega tròp sovent de mots non
japoneses dins sa programacion, çò que fa que los espectators mai
vièlhs, qu’estudièron pas de lengas estrangièras, ajan de difucultats de
compreneson.
Entre d’autres mots denóncia l’emplec de toraburu (adaptacion japonesa de l’anglés trouble per dire “problèma”) o de kea (de l’anglés care
que vòl dire “sonhar”). Ditz qu’extistisson plan d’alternativas mai
simplas en japonés. Per contra, admet que lo fenomèn dels neologismes es
una causa generalizada e non sonque d’NHK. Ça que la, a volgut lançar
un “avertiment”. Cal dire qu’es sòci de l’Associacion sus l’Importància
de l’Emplec del Japonés.
Los representants de l’entitat publica japonesa an refusat de se
prononciar sus l’afar, en disent que la denóncia es en mans del
departament legal de l’entrepresa que l’estúdia en detalh.
Pr’amor de la nauta quantitat d’argent reclamada, la denóncia la cal
tractar dins de tribunals d’instància superiora, segon lo còde civil
japonés.
[Image: Rs1421 - poblejat dins www.jornalet.com]
Sem comentários:
Enviar um comentário