Barcelona: una enòrma manifestacion a revendicat l’unitat politica devèrs l’independéncia

La pus petita de las grandas manifestacions a tanplan reclamat la contèsta sociala fàcia a la senténcia suls presonièrs politics

Coma cada an, de drapèls occitans an mostrat lo sosten 

occitanista a las revendicacions catalanas. Ongan èran 

mai que mai sul tròç ont manifestavan los araneses

L’unitat dels independentistas es estada la revendicacion màger de la manifestacion de la Diada de Catalonha d’ongan, marcada tanben pels presonièrs politics e per una contèsta sociala davant la senténcia qu’arribarà lèu de la Cort Suprèma espanhòla. Coma cada an, dempuèi 2010, de centenats de milièrs de personas an manifestat pel centre de Barcelona, una manifestacion massissa e mai la polícia aja raportat 600 000 personas, çò que seriá lo nombre pus bas dempuèi 2012, fàcia al milion que raportèt arunan. “Èra la Diada pus dificila”, segon l’Assemblada Nacionala Catalana (ANC), en referéncia a las criticas e al descoratjament d’una partida de l’independentisme catalan.

 
Jos lo lèma “Objectiu independéncia” la manifestacion tenguèt per ponch central la Plaça d’Espanha de Barcelona del temps que los manifestants emplissián las cinc carrièras que confluisson sus aquela plaça. Sus l’empont, los parladisses de coneguts actors e musicians catalans an mostrat la diversitat de la societat civila e an revendicat l’unitat estrategica, “en metent l’independéncia al centre del debat”, çò precisèt la presidenta de l’ANC. D’autre caire, se faguèt tanben una crida a la desobesissença civila non violenta e a la cauma del consum.
 
Coma cada an, de drapèls occitans an mostrat lo sosten occitanista a las revendicacions catalanas. Ongan èran mai que mai sul tròç ont manifestavan los araneses.
 
Al delà de la manifestacion, la capitala catalana aculhiguèt ièr d’actes oficials e socials de sosten als presonièrs politics e als exiliats, de concèrts per l’independéncia. Coma d’abitud, se tenguèt la fièra d’associacions del país, ont lo CAÒC e Macarèl portèron las colors d’Occitània. En mai d’aquò, s’organizèt una fièra de consum estrategic de produches, espleches e servicis del país.
 
L’11 de setembre, los catalans se remembran la casuda de Barcelona en 1714 davant las tropas borbonosas. Lo País Valencian èra tombat en 1707 e Malhòrca anava èsser vencuda en 1716. Aquela desfacha representèt la fin de las institucions catalanas e la castelhanizacion del país.

[Imatge: Zep Armentano - poblejat dins www.jornalet.com]