segunda-feira, 13 de fevereiro de 2017

Catalonha: la societat civila se mobiliza per aculhir los refugiats

La campanha “Cò nòstre, cò vòstre” amassa a l’ora d’ara mai de 70 000 sostens de particulars e de mai de 900 d’associacions
A l’espectacle, entitolat “Volèm aculhir”,  participèron un cinquantenat d’artistas dont qualques unes plan coneguts
A l’espectacle, entitolat “Volèm aculhir”,  participèron un cinquantenat d’artistas
dont qualques unes plan coneguts 
a societat civila de Catalonha se mobilizèt un còp de mai dissabte passat per exigir una solucion immediata a la crisi umanitària dels refugiats. Dins l’encastre de la campanha nomenada “Casa nostra, casa vostra” (cò nòstre, cò vòstre), divèrsas vilas del país an organizat mai d’una activitat dins las darrièras setmanas, e dissabte que ven se tendrà una manifestacion a Barcelona que se prevei multitudinària. 

Un macroconcèrt revendicatiu


De soslinhar lo concertàs revendicatiu que se tenguèt dissabte passat al Palais Sant Jòrdi de Barcelona, una encencha esportiva qu’èra tota comola de mond per un concèrt que sas intradas s’èran agotadas qualques jorns après la mesa en venda.


A l’espectacle, entitolat “Volèm aculhir”, participèron un cinquantenat d’artistas dont qualques unes plan coneguts coma Lluís Llach, Joan Manuel Serrat, Manolo García, Sílvia Pérez Cruz, Txarango, Marina Rosell, Paco Ibáñez, Farruquito, Amaral,  Los Chichos... E mai i testimonièron qualques refugiats e prenguèron la paraula de volontaris que son sus plaça per ajudar e salvar de vidas, mai que mai en Grècia. Tanben i participèron quatre grops de “castellers”. L’eveniment foguèt retransmés en dirècte per TV3 e Catalonha Ràdio.

La tòca de l’espectacle èra d’encaissar d’argent per ajudar las personas refugiadas. Pasmens venguèt un clam revendicatiu per denonciar, d’un biais ferme e clar, los govèrns europèus, exigir l’aculhença immediata dels refugiats e lo cessament de la complicitat amb la guèrra de Siria.



 
 
Dos còps mai de volontaris que de refugiats
 
La campanha “Casa nostra, casa vòstra” amassa a l’ora d’ara mai de 62 000 sostens de particulars e de mai de 900 d’associacions e, delà lo concertàs, a organizat divèrses eveniments mediatics coma de mosaïcs revendicatius dins d’estadis de fotbòl.
 
De soslinhar las mai de 1200 personas que se son inscrichas per èsser de “mentòrs” dels refugiats.
 
A l’ora d’ara, en Catalonha, i a dos còps mai de volontaris que de refugiats.
 
 
De donadas vergonhosas
 
Aquela campanha mediatica a coincidit amb las donadas vergonhosas que ven de publicar l’Union Europèa, que meton en evidéncia que los estats membres de l’union an solament acceptat sus lor territòri una part infima dels refugiats que s’èran engatjats a aculhir.
 
A l’ora d’ara, los estats de l’UE an solament recebut 11 960 refugiats que provenon de Grècia e d’Itàlia, e mai se s’èran engatjats a n’acceptar 160 000. Aquela donada es clarament insufisenta se se pren en compte que pendent l’an 2016 arribèron 181 436 personas sonque en Itàlia. 
 
Euròpa al caireforc
 
Sembla pas que la situacion siá a se melhorar dins los meses avenidors. Ongan i a d’eleccions dins los principals estats de l’UE, ont los partits xenofòbs e d’ultradrecha son a créisser, encara mai après lo Brexit e la victòria de Donald Trump als Estats Units.
 
Lo 15 de març que ven, i aurà d’eleccions als Païses Basses, ont lo xenofòb Partit per la Libertat de Geerd Wilders pòt venir la primièra fòrça. Lo 23 d’abril se tendrà lo primièr torn de la presidenciala francesa, ont Marine Le Pen pòt èsser la candidata pus votada —e los occitans n’aurem una bona part de responsabilitat—. Dins las eleccions alemandas de setembre, Alternativa per Alemanha pòt venir la tresena fòrça. En mai d’aquò, lo Reialme Unit començarà lo Brexit, qu’a centrat sa campanha sul contraròtle de l’immigracion.
 
Los resultats electorals pòdon marcar l’avenir d’Euròpa. Un sondatge de Chatham House, un dels thinktanks mai reconeguts, assegurava que lo 55% dels europèus èra en favor d’arrestar l'immigracion musulmana. Lo gra d’acòrdi a l’enebicion de lor l’intrada èra mai que mai naut en Polonha (71%) e en Ongria (64%), d’estats que participan pas mai a l’aculhença dels refugiats. Tanben èra de manièra inquietanta majoritari en Àustria (65%), Alemanha (53%) e Itàlia (51%).
 
Cal remarcar qu'a l'ora d'ara solament lo 7,6% de totes los refugiats del Mond se tròban dins l'UE, e que lo milion que i son arribats representa solament lo 0,2% de la populacion europèa. Dels 65,3 milions de refugiats e desplaçats del Mond, l’87% se tròba dins de païses en desvolopament, e la chifra es creissenta que, fa dètz ans, la proporcion èra del 70% contra lo 30%. Los estats qu’aculhisson mai de refugiats son Jordania, Paquistan, Iran, Etiopia, Kenya, Liban, Chad e Turquia.




[Imatge: Europa Press Catalunya - poblejat dins www.jornalet.com]

Nenhum comentário:

Postar um comentário