Lo Collègi de Jornalistas de Catalonha planh la decision del Conselh Electoral, qu’obliga la Television de Catalonha de consagrar als partits espanholistas lo meteis temps d’emission que durèt la retransmission de la manifestacion de l’11 de setembre passat.
La campanha electorala dels comicis del 27 de setembre que ven, en Catalonha e Aran, se prevesiá plena de tensions. S’agís d’una eleccion autonomica que serà un plebiscit sus l’independéncia. Lo debat entre partits e partisans es dobèrt e solament los ciutadans lo clavaràn lo jorn de l’eleccion. Ça que la, sembla que l’aparelh de l’estat tanben poiriá trabalhar per influir lo vòte dels ciutadans.
Divendres passat Barcelona visquèt una enòrma manifestacion independentista, un eveniment màger que la television de Catalonha TV3 considerèt de naut interès informatiu e retransmetèt en dirècte. Pasmens, èra lo primièr jorn de la campanha electorala e lo Conselh Electoral de l’estat espanhòl obliga que TV3 consagre als partits espanholistas lo meteis temps que consagrèt a la retransmission de la manifestacion.
De son costat, lo Collègi dels Jornalistas de Catalonha considèra que la resolucion del Conselh Electoral espanhòl es “una mòstra de mai de la bestiesa que consistís a emplegar pas los critèris jornalistics per informar pendent las campanhas electoralas”. Dins un comunicat, lo Collègi soslinha qu’a denonciat aquela practica davant la Cort Europèa dels Dreches Umans d’Estrasborg.
[Image: ANC - poblejat dins www.jornalet.com]
Sem comentários:
Enviar um comentário