Lo jutge espanhòl José Castro, a inculpat l’enfanta Cristina de Borbon,
filha del rei Joan Carles I d'Espanha, per frauda fiscala e blanquiment
de capitals, e l’a convocada pel 8 de març al tribunal de Palma de
Malhòrca.
En abrial de 2012 lo jutge l’aviá ja mesa en examèn un primièr còp per
trafec d’influéncia, mas aquela decision foguèt annulada en seguida d’un
recors del ministèri public. Lo jutge cerca a establir se l'enfanta
Cristina a de ligams amb las presomptivas activitats fraudolosas de son marit,
Iñaki Urdangarin, un èx-esportiu vengut òme d’afars, qu’a sos 45 ans es
suspècte d’aver desviat 6,1 milions d’èuros d’argent public amb son
ancian associat, Diego Torres, quand èra lo president d’una societat
non-lucrativa nomenada institut Nóos.
L’inculpacion arriba al pièger moment pel rei Joan Carles I, que dimenge
passat festegèt son 76n anniversari, e qu'al mitan d'una ceremònia
militara se mostrèt aparentament fatigat, en tot s’enganar sovent quand legissiá son discors.
A l’ora d’ara, la resolucion del jutge, de 227 paginas, atribuís a
l'enfanta dos delictes punits severament pel còdi penal espanhòl.
L’emblanquiment de capitals implica una pena d'empresonament de fins a
sièis ans e una esmenda que pòt triplar la soma afectada. De mai, lo
delicte fiscal pòt implicar un maximum de cinc ans de preson e una
sancion economica.
L’avocat de l’enfanta Cristina, Miquel Roca i Junyent, a anonciat la
presentacion d'un recors contra aquela convocacion. Se se tornèsse
revocar la mesa en causa, lo jutge se poiriá pas mai metre en causa
l’enfanta.
[Poblejat dins www.jornalet.com]
Sem comentários:
Enviar um comentário