Argentina a mes en mandat d’arrèst internacional quatre torturaires franquistas espanhòls

“Primièr pas que fendascla l’impunitat del franquisme”, çò a dich lo pòrtavotz dels planhents

Una magistrada argentina a sollicitat a travèrs d’Interpòl l’extradicion d’èx-nauts responsables de la polícia estatala espanhòla e de la gàrdia civila, acusats de delictes de torturas pendent lo franquisme. La jutgessa María Servini de Cubría met en examen los crimes comeses pendent la dictatura espanhòla. La resolucion es un mandat d’arrèst internacional, amb fins d’extradicion, per l’èx-gàrdia civil Jèsus Muñecas Aguilar; l’èx-escòrta de Franco e del palais reial espanhòl, Celso Galván Abascal; l’èx-comissari José Ignacio Giralte González; e l’èx-inspector José Antonio González Pacheco.

 

La resolucion se comuniquèt a las associacions que faguèron lor denóncia a Buenos Aires en 2010, après que l’Audiéncia espanhòla, lo tribunal estatal, desestimèsse l’afar.

 

Es un “primièr pas que fendascla l’impunitat del franquisme”, çò diguèt Emilio Silva, fondador de l’Associacion per la Recuperacion de la Memòria Istorica. 

[Poblejat dins www.jornalet.com]