Euròpa vòl que las negociacions del Brexit se fagan en francés

Qualques politicians del Reialme Unit o an considerat coma un acte de guèrra

Lo cargat per l’Union Europèa de menar las negociacions del Brexit, Michel Barnier, desira qu’aquestas negociacions se menen a bon tèrme exclusivament en francés. E mai se s’es pas pres cap de decision, aquela proposicion significariá cambiar la practica abituala de parlar anglés quand s'agís de tèmas internacionals.

 

Segon Reuters, qualques politicians britanics considèran qu’aquela decision es “un acte de guèrra”. Totun, los collaboradors de Barnier, èx-ministre dels Afars Exteriors de França, considèran qu’es “normal” qu’el vòlga far las negociacions dins sa lenga mairala.

 

Abans de far aquela proposicion, Barnier èra pas tròp aimat per la classa politica britanica a causa de sas intervencions a la City coma comissari europèu. Totun, el a beneficiat del sosten d’Angela Merkel, qu'a defendut que cadun se pòsca exprimir dins sa lenga, e a declarat qu'es pas estonant que Barnier o vòlga far en francés, coma ela o fa en alemand.

 

La lenga de las negociacions se decidirà del temps que lo govèrn britanic activarà l’article 50 del Tractat de l'Union Europèa per abandonar lo club dels vint e uèch.

[Poblejat dins www.jornalet.com]