Bruno Le Maire, de l’UMP, n’a demandat la supression e se ditz indignat perque, segon el, l’escòla republicana “unicament se deuriá encargar d’ensenhar un perfièch mestritge del francés”
Lo deputat francés UMP Bruno Le Maire a demandat la supression dels ensenhaments de las lengas e culturas d’origina, regits segon una directiva europèa que fa ensenhar la lenga e la cutura pròprias dels enfants de cèrtas originas immigrantas. Lo deputat, d’origina francesa e francofòn, o demandèt ièr dimars a miègjorn, dins l’encastre de las questions al govèrn francés. Le Maire se mòstra indignat e compren pas perqué l’escòla republicana se deu encargar d’ensenhar aquelas lengas. Segon el “unicament se deuriá encargar de lor ensenhar un perfièch mestritge del francés”.
Lo dispositiu que Le Maire vòl suprimir foguèt aviat dins los ans 1970 e concernís 92 500 escolans dins l’estat francés, que lor permet d’èsser pas d’analfabets dins la lenga e la cultura del país d’origina. Dins la resèrva de las plaças disponiblas, d’autres enfants tanben i pòdon participar, se son interessats per la lenga e la cultura dels amics. L’inscripcion se fa sus la basa del volontariat e l’ensenhament es assegurat fòra las oras de cors, per un personal pagat e format per las ambaissadas dels nòu estats engatjats en aquela directiva: Argeria, Croàcia, Espanha, Itàlia, Marròc, Portugal, Serbia, Tunisia e Turquia.
L’existéncia d’aquel dispositiu es mesa en causa constantament dins l’extrèma drecha, qu’esitan pas a far d’alarmisme en parlar d’islamizacion de l’escòla. Mas la drecha de l’UMP se i èra mostrada favorabla.
La pensada radicalament opausada a aquela de Le Maire se tròba dins lo sistèma educatiu de Catalonha ont qualques escòlas, en mai d’aquelas lengas e culturas, prepausan tanben d’ensenhar las lengas e culturas d’origina minorizadas, mai que mai lo berbèr, lo quíchoa e lo guaraní, que son tres lengas fòrça importantas dins aquel país.
[Poblejat dins www.jornalet.com]
Sem comentários:
Enviar um comentário