L’estat francés ataca en justícia una associacion independentista de Catalonha Nòrd

L’estat francés voldriá suprimir lo Comitat per l’Autodeterminacion de Catalonha Nòrd, en l’acusant davant la justícia “d’atemptar contra l’integritat del territòri nacional francés”. Es çò que los responsables del comitat an dich a L’Indépendant e a l’associacion independentista Ara o Mai.

 

Lo comitat se creèt arunan a Perpinhan en se registrant coma associacion de drech francés lo 27 de genièr de 2014, a la Prefectura dels Pirenèus Orientals, amb sa publicacion al Bulletin Oficial.

 

L’associacion es ara atacada per l’estat francés, representat pel prefècte del departament mençonat, perque cèrca d’organizar un referendum popular d’autodeterminacion en Catalonha Nòrd, e per aquò far an obtengut una lista de 300 000 votants del departament. Dins lo vòte voldrián pausar doas questions:

 

“(1) Ès per la Grand Catalonha, jonhent Catalonha Nòrd e Catalonha Sud dins un estat independent e sobeiran?

 

(2)  Ès per que Catalonha Nòrd venga un estat independent e sobeiran?”

 

Segon los responsables del comitat, Robert Casanovas, Mèstre Codognes e Gérard Lenfant, an pas jamai dich que proclamarián l’independéncia, mas que solament fan “una reflexion intellectuala”. “Sèm pas una institucion”, çò dison, en apondent que solament vòlon “conéisser l’opinion dels ciutadans sus çò que se passa en Catalonha”.

 

De son costat l’estat francés justifica la dissolucion del comitat perque, dins los estatuts de l’associacion, se considèra de causas “dangierosas” coma per exemple que la lenga catalana seriá plaçada “jos la supervision de la Republica Francesa en Catalonha Nòrd” o que “la dominacion de la Republica Francesa sus Catalonha Nòrd a conduch a un caumatge massís, a l’exòde dels joves, a l’aument de la pauretat, a la diminucion dels nivèls de vida e a la destruccion del ret economic”. Es pr’amor d’aquò que l’estat francés considèra que i a agut un atac contra l’integritat del “territòri nacional” (vòl dire “territòri estatal”).

 

L’Indépendant, en mai de publicar la nòva, a lançat un sondatge demandant als legeires se creson que l’estat francés deu intervenir, o pas, contra lo Comitat per l’Autodeterminacion. La màger part dels legeires son contra la decision de l’estat.

[Sorsa: www.aranes.org]