Lo pòble gitano a commemorat lo setanten anniversari del genocidi a Auschwitz

Lo 2 d’agost de 1944, l’Alemanha nazi maselèt totes los gitanos que demoravan al camp de concentracion 

Aisling Twomey

Dissabte faguèt setanta ans del genocidi del pòble gitano al camp de concentracion d’Auschwitz. La nuèch del 2 d’agost de 1944, moriguèron dins las cambras de gas totas las femnas, los enfants e los vièlhs que demoravan al Zigeunerlager, la partida del camp ont i aviá lo pòble gitano. L’extermini foguèt de mai de 2800 personas. A Auschwitz cap de gitano subrevisquèt pas.

La matança del 2 d’agost foguèt pas la sola que faguèt l’Alemanha nazi al pòble gitano. Dels près de 23 000 gitanos que foguèron de presonièrs a Auschwitz, l’85% foguèron maselats.

Setanta ans puèi, s’es commemorat l’anniversari del genocidi gitano amb d’actes al quite camp d’Auschwitz-Birkenau (Polonha), dins la zòna ont i a lo memorial del masèl. Las accions de remembre, que comptèron amb un milierat de participants, comprenguèron tanben d’actes adreiçats als joves, que los a organizat TernYpe, una organizacion internacionala que coordena d’associacions de diferents païses trabalhant per favorizar lo respècte entre los joves gitanos e los qu’o son pas.

En mai de l’acte commemoratiu a Auschwitz-Birkenau, TernYpe convidèt tanben totes a far d’accions en linha per divulgar l’anniversari del genocidi. Una de las proposicions èra de publicar de fiuladas sus Twitter amb l’etiqueta #RomaGenocide, dissabte, a uèch oras del ser. 

Reconeissença oficiala

Las manifestacions oficialas de reconeissença del genocidi del pòble gitano de 1944 deguèron esperar trenta cinc ans après lo masèl. Los gitanos subrevivents de la persecucion nazi faguèron pas conéisser lors istòrias. Segon Andrzej Mirga, expèrt en afars del pòble gitano, lo silenci faguèt qu’après 1945, fòrça païses condemnèsson pas la persecucion raciala dels gitanos.

En 1980, Alemanha reconeguèt que lo masèl s’èra menat a tèrme que per de motius racials. En 1994, los gitanos comencèron de commemorar lo chaple que patiguèron lo 2 d’agost e, en 2001, lo musèu d’Auschwitz inaugurèt una exposicion permanenta sul genocidi del pòble gitano. 

[Poblejat dins www.jornalet.com]