Lo Pòble enebit, un documentari quebequés que descriu lo procès d’independéncia de Catalonha

Dirigida per Alexandre Chartrand, la produccion foguèt ja testimòni del procès participatiu d’arunan e ara cèrca de fonzes per enregistrar l’eleccion del 27 de setembre que ven

Lo Pòble enebit (le Peuple interdit) es un documentari quebequés que fa un retrach del procès d’independéncia de Catalonha. Partís de la volontat del pòble catalan de far un referendum e mòstra los eveniments d’arunan fins a arribar al procès participatiu del 9 de novembre de 2014.

La còla, dirigida pel realizaire quebequés Alexandre Chartrand, vòl contunhar lo documentari e anar en Catalonha per èsser testimòni de las eleccions del 27 de setembre que ven. Es pr’amor d’aquò que demanda de finançament mejançant la plataforma Indiegogo. Las bilhetas d’avion e lo lotjament son ja assegurats gràcias al sosten d’activistas catalans, mas lor manca cinc mila èuros.

Podètz veire çai jos un resumit de la primièra partida del documentari, qu’es ja enregistrada e que descriu los eveniments d’arunan.

[Poblejat dins www.jornalet.com]