La jove cantaira Renata Flores Rivera es venguda la sensacion dels rets socials per sas versions de cançons conegudas interpretadas en quíchoa
La jove peroviana Renata Flores Rivera, dins sos 14 ans, es venguda la sensacion dels rets socials per sas versions en lenga quíchoa de cançons fòrça conegudas. Lo vidèo de la version quíchoa de la cançon The Way You Make Me Feel, de Michael Jackson, enregistrat dins lo sit inca de Willkawaman, a despassat de luènh lo milion de vesitas sus YouTube.
Es la maire de la jove cantaira qu’aguèt l’idèa, segon çò que rapòrta Global Voices. Ela trabalha per l’Associacion Culturala Surca dins un programa nomenat “Los joves tanben parlam quíchoa”, amb la tòca de difondre l’usatge de la lenga autoctòna. Aquela associacion, que se fondèt fa 11 ans, trabalha dins la prevencion de las drògas e dins la difusion de la lenga del país demest los joves del departament d’Ayaquchu, e capita pro ben en emplegant l’art coma aisina de conscientizacion.
De fach, los comentaris sul compte Facebook de la jove cantaira son majoritàriament positius. E sus Twitter se parteja ja la version en quíchoa d’un autre classic del rock: The House Of Rising Sun de The Animals.
[Poblejat dins www.jornalet.com]
Sem comentários:
Enviar um comentário