quarta-feira, 14 de dezembro de 2016

La television e la ràdio publicas de Peró començan uèi lors emissions en quíchoa

A partir de uèi retransmeton simultanèament lo programa d’informacions matinal Ñuqanchik de diluns a divendres


A partir de uèi, 12 de decembre, la television e la ràdio publicas de Peró retransmeton simultanèament un complet programa informatiu en lenga quíchoa. Nomenat Ñuqanchik (nosautres), lo programa s’emet de diluns a divendres e es menat pels jornalistas Clodomiro Landeo e Marisol Mena.

Ñuqanchik comença amb fòrça vam. Dempuèi qualques setmanas se’n parla dins totes los mèdias del país e es aculhit amb estrambòrd. Sa tòca es d’arribar a la populacion quichoafòna “qu'en tròp d’ocasions es estada relegada e quitament discriminada”, çò declarava a TV Perú la productritz del programa Carol Ruíz.

S’agís de la primièra emission informativa en aquela lenga jamai difusada en Peró. Un autre programa informatiu en quíchoa s’emet dempuèi 2014 sus Telesur, una cadena de television americana promoguda per l’estat veneçolan, qu’a l’ora d’ara a de delegacions en Argentina, Uruguai, Bolívia e Eqüator.


Dètz milions de locutors

Apelat “runasimi”, çò es “lenga de las gents”, lo quíchoa es parlat per aperaquí dètz milions de personas dins los estats de Colómbia, l'Eqüator, Peró, Bolívia, Chile e Argentina.







[Poblejat dins www.jornalet.com]

Nenhum comentário:

Postar um comentário