Embiado por Israel Benyakar
Un ombre ke se mantenia vendiendo chapeos, uno de los dias le kayo el kamino a una montanya. De tanto kaminar el kedo alientro de la sudor, le suvio la chapeta i estando muy kansado se asento debasho de un arvole. El sesto yeno de chapeos ke tenia en el braso lo desho en basho, i se echo a durmir para deskansar un poko.
Despues de unas kuantas oras empeso a oyir bozes de maymunas, lo ke le vino muy toaf (estranyo). El ombre se desperta i ve ke el sesto de chapeos esta vazio. El ke alevanta la kavesa, ke ve?! Todos los arvoles yenos de maymunikas i kada una kon uno de sus chapeos sovre su kavesa.
Empeso a pensar de komo rijirse? Kualo deve de azer para tomar los chapeos atras. El ombre todo en pensando va araskando su kavesa i vido ke todas las maymunas empesaron, eyas tambien, a araksar sus kavesas. El alevanto las manos en alto i todas las maymunas lo imitaron...En kurto, el ombre ya topo lo ke ay de azer para resivir sus chapeos atras: el se kito el chapeo i lo echo en basho, i todas las maymunas izieron lo mizmo. El kon grande alegria arekojio los chapeos, los metio en el sesto i kontinuo en su kamino...
La vida koriendo, el eskuriendo, paso ensima de este kavzo mas de 50 anyos...el ombre paso el ofisio a su ijo ke se mantuvo largo tiempo vendiendo chapeos i en fin el tambien desho el echo a su ijo: al kavo i el inyeto se izo vendedor de chapeos. Un dia el kamino del inyeto tambien kayo al mizmo lugar de su nono, ande le avia akontesido akel evenimiento kon las maymunas. El aver estava yene muy kaente i el mansevo estava muy kansado; el se asento debasho de un arvole, metio el sestiko a su lado i se durmio...
Kuando se desperto, despues de una ora, el ve ke los chapeos no estan en el sestiko, se bolaron... En esto el oyo gritos i chiyos de maymunikas. Alevantando la kavesa kualo ve?! Los arvoles yenos de maymunikas i kada una kon uno de sus chapeos sovre su kavesa.
Pensando kualo azer para tomar los chapeos atras se akodro de lo ke le avia kontado su nono anyos atras. Se empeso a araskar la kavesa, i las maymunas lo mizmo... Alevanto sus brasos en alto i las maymunas tambien... En riyendo kito el chapeo ke tenia sovre la kavesa i lo echo en basho. En supito una de las maymunas salto de uno de los arvoles, abasho presto presto, tomo de en basho el chapeo del djoven, le dio un chaketon en la kara i le disho:
“Solo tu tienes nono, ijo-d’un-maredo!?”
[Orijin: www.akiyerushalayim.com]
Sem comentários:
Enviar um comentário