Badok, tota la musica basca a un clic

Lo portal, ligat al jornal Berria, ofrís una larga basa de donadas, amb musica d’escotar e de contenguts jornalistics

Tota la musica basca, a posita de totes amb un sol clic. Es çò qu’ofrís lo portal Badok, un projècte que comencèt fa cinc ans de la man d’un grop de jornalistas del jornal Berria e qu’ara renais amb de nòus contenguts e qu’es adaptat als nòus tempses. “En 2009 decidiguèrem de crear una basa de donadas numerica sus la musica basca. Lo principal objectiu èra de palliar lo deficit de documentacion que i aviá sus aquò”, çò explica a Vilaweb un dels responsables, Jon Eskisabel. “Coma jornalistas percebiam un voide e lo portal lo deviá cobrir”.

 

Es aital que comencèron de crear una basa de donadas qu’amassa a l’ora d’ara l’istòria de la cançon basca en dètz capítols, amb las biografias e las fichas tecnicas de 175 artistas. Ongan li an volgut donar una nòva vida, en renovelant lo portal e en l’adaptant a l’èra numerica. Aital, en mai de la basa de donadas, Badok ven una plataforma per escotar de musica: s’i son compreses cinc lectors automatics, segon lo cas, que permeton d’escotar aperaquí 13 000 de las 19 000 cançons que conten. Fin finala, Badok es tanben una revista musicala, amb de contenguts jornalistics partejats amb lo jornal Berria e una tribuna d’opinion. “Volèm èsser una veirina de la musica en euscar al Bascoat, que de còps manca de visibilitat”, çò explica Eskisabel encara a Vilaweb.

 

Lo nom del portal, Badok, es un omenatge a Ez Dok Amairu, grop que nasquèt dins los ans 1960. Ez Dok Amairu vòl dire “i a pas tretze”, e la formacion voliá recuperar la musica basca e trencar lo malefici cultural. Ara aquel grop de jornalistas an nomenat lo portal Badok, es a dire, “òc que n’i a”: i a de cançon basca, i a de patrimòni, i a de grops e i a de milièrs de cançons. Las avètz aquí, cal solament clicar, cercar e escotar.

fffff		fffff
	Paraulas en Òc, lo referent occitan Lo portal Paraulas en Òc, mestrejat per la jornalista e webmèstra Aura Séguier, es l’omològ occitan de Badok. Conten las paraulas de mai de 3500 cançons, un annuari de 496 artistas, una discografia de mai de 900 obratges, l’agenda, las actualitats musicalas occitanas, de vidèos, de fòtos, de son... Lo portal es en plena creissença e per l’an que ven espèra d’ofrir fòrça mai de contenguts amb mai de vam.

[Poblejat dins www.jornalet.com]